Realme presenta un sistema de carga rápida a 320 watts

Realme vén de organizar un evento mundial para presentar a nova xeración de carga rápida para móbiles, sorprendendo coa tecnoloxía SuperSonic Charge de 320 watts, capaz de cargar un teléfono móbil (cunha batería de 4.420 mAh) completamente en só catro minutos e medio.
O ano pasado xa presentaran un Realme GT3 con carga rápida de 240 watts, e a tecnoloxía actual permite chegar até os 320 watts sen incrementar o tamaño do cargador. Aínda que polo momento non se comunicaron os plans para a incorporación desta tecnoloxía, coñecendo os precedentes podemos entender que nos vindeiros meses lanzarán algún móbil con esta carga superrápida, para así coller a dianteira a Xiaomi (que presentou un sistema de carga de 300 watts, que aínda non chegou ao mercado).