Recompilan varios vídeoxogos clásicos da Marvel

Limited Run Games e Konami anuncian Marvel MaXimum Collection, unha recompilación que recupera boa parte do legado dos videoxogos da Marvel nos anos noventa. O paquete reúne distintas versións aparecidas en máquinas recreativas e consolas domésticas de 8 e 16 bits, configurando unha panorámica ampla da etapa máis pixelada da editorial estadounidense.
A colección inclúe seis títulos principais con múltiples adaptacións segundo plataforma: X-Men: The Arcade Game, Captain America and the Avengers, Spider-Man/Venom: Maximum Carnage, Venom/Spider-Man: Separation Anxiety, Spider-Man/X-Men: Arcade’s Revenge e Silver Surfer. No seu conxunto, o lanzamento suma 13 edicións diferentes entre versións recreativas, domésticas e portátiles.
O prato forte é X-Men: The Arcade Game, a recreativa de Konami que marcou época nos salóns arcade. Nesta edición intégrase xogo en liña para ata seis participantes con tecnoloxía rollback netcode, unha solución que mellora a sincronización nas partidas multixogador a distancia. O título permite escoller entre varios membros da Patrulla X para combater o exército de Magneto nun clásico beat ’em up cooperativo.
Tamén está presente Captain America and the Avengers, tanto na súa versión recreativa como nas adaptacións para MEGA e sistemas de 8 bits, nas que o enfoque varía cara a un deseño máis próximo ás plataformas de acción. Pola súa banda, Spider-Man/Venom: Maximum Carnage e Venom/Spider-Man: Separation Anxiety trasladan ao formato de 16 bits as historias dos simbiontes Venom e Matanza, con opción cooperativa para dous xogadores e unha marcada identidade sonora de inspiración rock.
Un dos títulos máis lembrados pola súa dificultade é Silver Surfer para 8 bits, un shooter horizontal que se converteu en símbolo da esixencia extrema da época. A colección incorpora ferramentas modernas que facilitan a experiencia, como gardado en calquera momento e función de rebobinado, pensadas para facer estes clásicos máis accesibles sen alterar o seu deseño orixinal.
Entre as melloras adicionais figuran un arquivo dixital con escaneos en alta resolución de caixas, manuais e publicidade histórica, un reprodutor musical cos temas de todas as versións incluídas e menús de trucos integrados (como vidas infinitas en determinados xogos). Tamén se ofrecen opcións de visualización que permiten escoller entre unha presentación de píxel nítido ou filtros que recrean o efecto CRT das televisións da época. A colección incorpora ademais nova música composta por Chris Huelsbeck, figura histórica da música para videoxogos.
Marvel MaXimum Collection chegará a PlayStation 5, Xbox Series X|S, Nintendo Switch e PC (Steam), recuperando unha boa mostra do catálogo clásico da Marvel nun formato accesible e actualizado.