Samsung e Google destacan os seus avances no eido da realidade estendida

Samsung Electronics anunciou unha actualización relevante para Galaxy XR que introduce capacidades empresariais baseadas en Android Enterprise e melloras na experiencia de uso diaria. Trátase dun avance estratéxico co que o fabricante surcoreano reforza o posicionamento do seu visor como ferramenta válida tanto para consumo como para contornas profesionais.
O principal anuncio de Samsung céntrase na chegada de Android Enterprise a Galaxy XR, o que permite trasladar ao ámbito da realidade estendida os mecanismos de xestión, despregadura e seguridade propios do ecosistema Android. Esta integración habilita casos de uso corporativos a gran escala en sectores como a formación, a industria, a sanidade ou o comercio.
Entre as funcionalidades incorporadas destacan os dispositivos totalmente xestionados, métodos de enrolamento como zero-touch ou códigos QR, así como a distribución de aplicacións mediante Managed Google Play. A isto súmanse capacidades de administración como políticas de seguridade, configuración de rede, restricións e control remoto, apoiadas pola capa de protección Samsung Knox. Ademais, Samsung comprométese a ofrecer actualizacións de software e parches de seguridade durante ata cinco anos.
En paralelo, a actualización tamén introduce melloras orientadas ao usuario final dentro do ecosistema Galaxy XR, como a personalización da posición do teclado virtual, a restauración automática de sesións ou novas opcións de accesibilidade, incluíndo seguimento ocular e axustes do punteiro. Tamén se incorpora un sistema de aliñación de paneis que facilita integrar contido dixital no espazo físico.
Pola súa parte, Google detallou as novidades a nivel de plataforma Android XR, que acompañan esta evolución do hardware de Samsung. Entre elas figura a autoespacialización de contidos, unha función experimental que permite converter aplicacións e contidos 2D en experiencias 3D inmersivas, dispoñible en contornas como Chrome ou YouTube.
Google tamén salientou o crecemento do ecosistema de aplicacións nativas XR, que xa supera o cento de propostas optimizadas, así como novas capacidades como a fixación de aplicacións en superficies físicas (por exemplo, paredes), a visualización das mans reais durante a interacción e a restauración automática de sesións.