Santiago e Coruña avanzan no seu proxecto smart compartido con Zaragoza e Madrid
luns, 19 de decembro do 2016
Os concellos
da Coruña, Santiago de Compostela, Madrid e Zaragoza asinaron hoxe o acordo para o desenvolvemento do seu proxecto conxunto de
transparencia smart. Trátase, máis en detalle, do
proxecto Plataforma de Goberno Aberto, Colaborativa e
Interoperábel. Esta proposta, como lembraremos, foi
unha das gañadoras da recente convocatoria de Cidades Intelixentes
de Red.es, obtendo a terceira mellor puntuación entre as iniciativas
presentadas (111). O investimento total do proxecto ascende a
2.090.461 euros, financiados por Red.es e os concellos, nun 60% e un
40%, respectivamente. O obxectivo do convenio formalizado é avanzar
na participación cidadá, nos datos abertos e na transparencia.
O proxecto, lembraron hoxe os concellos
devanditos, susténtase en tres eixos de acción. En primeiro lugar,
os datos abertos e a consecuente creación de infraestrutura
tecnolóxica e o establecemento dun conxunto de datos común,
xeración de documentación e exemplos de uso. En segundo lugar, na
área de participación potenciaranse as propostas cidadás, onde se
inclúe o deseño de procesos de participación, xeración e
implantación de software de xestión de propostas, software’’ de
votación sistema de xestión de votacións, difusión e capacitación
e avaliación de proceso. O último bloque oriéntase á
transparencia, para o que se crearán portais de transparencia
enlazados con datos abertos, procesos participativos para a
definición de indicadores, portal de transparencia baseado en datos
abertos e cadros de mando.
Segundo fixeron saber, ao abeiro do
proxecto levaranse a cabo “servizos que favorezan a participación
da cidadanía na toma de decisións de cada concello, a través dunha
plataforma de goberno aberto que poida ser desenvolvida de forma
conxunta”. Entre os obxectivos concretos a conseguir, figuran os
seguintes: melloras e aforros na xestión dos servizos públicos,
fomentar a interoperabilidade con distintas administracións e
axentes ou promover o acceso transparente e universal dos datos
públicos dos servizos (“tanto para a súa consulta como para a súa
reutilización”) por parte de cidadáns, visitantes, profesionais e
empresas, “propiciando con estas actuacións o crecemento da
industria e o emprendemento”.
Amais, impulsarase a creación de espazos
tecnolóxicos con contornas TIC interoperábeis, “que permitan o
desenvolvemento de proxectos cooperativos e innovadores que faciliten
a experimentación, o desenvolvemento de aplicacións, o intercambio
de boas prácticas e o uso compartido de ferramentas tecnolóxicas”.
Entroncando con isto, os catro concellos fixeron saber que o proxecto
parte dun “alicerce de reutilización”, de compartir e replicar
todos os recursos xa dispoñíbeis nunhas e noutras cidades e de
empregar a fondo tecnoloxía de software libre (toda a documentación
está subida a GitHub e todos os recursos que se desenvolvan serán
open source, con licenzas AGPLv3 ou Apache v2). O proceso terá
unha duración de tres anos, nos que as cidades colaborarán no
desenvolvemento das actividades descritas, “permitindo que as
experiencias que cada un dos participantes xa puxo en marcha, poidan
servir como punto de partida para o resto de urbes interesadas”.