Steam podería deixar de desglosar o uso da IA que se fai nos videoxogos

Actualmente en Steam o uso da IA na creación de videoxogos está etiquetado dun xeito semellante ao contido pornográfico

Epic Games volve situarse no centro do debate sobre a integración da intelixencia artificial na industria do videoxogo tras comentarios do seu director xeral, Tim Sweeney, quen manifestou que as etiquetas Made with AI que Steam e outras tendas dixitais están a empregar para sinalar contidos xerados con ferramentas de IA deberían desaparecer. Segundo o empresario, estas advertencias perderán relevancia a medida que a tecnoloxía se converta nun elemento omnipresente nos procesos de produción.
Nunha intervención en X, Sweeney argumentou que a utilidade destas etiquetas pode ter sentido en ámbitos como exposicións artísticas ou mercados de licenzas dixitais, onde é necesario aclarar a autoría e os dereitos de uso. Porén, considera que no caso das tendas de videoxogos carecen de valor, xa que «a IA estará presente en case toda produción futura». Nun ton irónico, chegou a suxerir que, seguindo esa lóxica, tamén se poderían incluír obrigas de revelar que marca de xampú emprega cada desenvolvedor.
A posición de Sweeney contrasta coa política recente de Steam, que tras un período de cautela decidiu permitir a maioría dos xogos creados con apoio de ferramentas de xeración automática, sempre que se faga constar esa circunstancia. O debate intensificouse nas últimas semanas, logo de que Nexon recibise críticas polo uso de voces xeradas por IA en Arc Raiders. O seu director executivo, Junghun Lee, defendeu que xa é razoable asumir que todas as compañías empregan esta tecnoloxía, reforzando a idea de que a súa adopción é transversal.
O discurso de Sweeney tamén se inscribe nun contexto máis amplo: Microsoft asegura que o 91 % dos seus equipos de enxeñaría utilizan GitHub Copilot, e cada vez máis ferramentas creativas incorporan algoritmos de xeración automática. Con todo, non todos os actores da industria comparten a visión de eliminar etiquetas. Un número crecente de desenvolvedores independentes está a converter o selo AI-free nun argumento comercial, apelando a un público que busca experiencias percibidas como máis humanas e artesanais.