Tencent loita contra o abuso dos videoxogos por parte de menores con recoñecemento facial

O editor chinés de videoxogos Tencent sorprendeu coa incorporación a máis de 60 dos seus xogos publicados en China dun sistema de recoñecemento facial que chaman Patrulla de Medianoite e que impide o acceso aos xogos se a verificación facial non se acepta entre as dez da noite e as oito da mañá. No horario indicado actívase este sistema para loitar contra o abuso dos videoxogos por parte de menores, xa que o sistema identifica se é un adulto autorizado o que está a empregar o dispositivo móbil, e de non ser así insta ao xogador a volver xogar ao día seguinte.
Resulta un tanto rechamante que en vez dun simple código PIN o xigante dos videoxogos opte por empregar tecnoloxía de recoñecemento facial, bastante habitual en China, pero que nos mercados occidentais conta con bastantes receos por parte dos cidadáns, que temen dun control excesivo e de posibles abusos dos sistemas de identificación.