Vodafone estrea esta semana o seu 4G en España

Tras os anuncios dos plans de Yoigo e Orange para achegar as súas redes 4G (nas bandas de 1.800 e 2.600 MHz) a algunhas cidades españolas, Vodafone quere adiantarse a estas compañía e anuncia que este mesmo mércores estreará os seus servizos LTE en Barcelona, Bilbao, Madrid, Málaga, Palma de Mallorca, Sevilla e Valencia, permitindo o seu pre-rexistro vía web e buscando ofrecer a cobertura 4G ao 55% da poboación das cidades incluídas no lanzamento e mellorándose tal cobertura ata o 85% dos exteriores e o 60% dos interiores dos edificios a finais do verán.
Esta tecnoloxía permitirá descargas de ata 150 Mbps de descarga e 50 Mbps en subida, aínda que a súa principal característica é a súa reducida latencia, que fai que este tipo de acceso á Rede poida competir en experiencia de uso con redes fixas (permitindo incluso xogar en liña).
Vodafone está a reforzar a súa rede de datos, de xeito que as cidades indicadas terán conexións 4G de ata 150 Mbps, as 32 cidades máis grandes de España gozarán de conexións 3G de ata 43,2 Mbps, as cidades entre 200.000 e 25.000 habitantes chegarán a velocidades de ata 21,6 Mbps e o resto do territorio contará con velocidades de banda larga móbil de ata 14,4 Mbps.
O servizo Vodafone 4G estará incluído no prezo dos plans Vodafone RED3, Vodafone RED3 Pro e Vodafone RED4 Pro, así como na tarifa de Internet Móbil de 10 Gb, mentres que o resto de usuarios que teña unha conexión de banda larga móbil que queira gozar do LTE deberá aboar 9 euros + IVE adicionais ao mes (aínda que de xeito promocional o servizo non terá sobrecusto ata o 30 de setembro).
Actualmente Vodafone conta cun amplo abano de móbiles e dispositivos compatibles coa tecnoloxía 4G, e no caso dos móbiles con iOS anuncia que en breve o iPhone 5 e o últimos iPad con conectividade móbil contarán cunha actualización que facilitará a súa conexións á rede 4G de Vodafone España.

Vídeo no que se anuncia o lanzamento do 4G de Vodafone en España