A LaconNetwork regresa á Costa da Morte o vindeiro venres
luns, 24 de outubro do 2011
- Imaxe do paseo en barco na anterior LaconNetwork que tivo lugar en Corcubión
A LaconNetwork, o “momento gástrico de cada último venres de
mes dos albaneis da nube, emprendedores, Internet e cloud computing”, chega
esta semana á súa edición número 22
retornando á vila de Corcubión, onde o
ano pasado tivera lugar un dos encontros desta iniciativa máis destacado e
lembrado, pois destacara por completar o xantar habitual deste tipo de
eventos cun paseo en barco pola ría.
Desta volta é a axencia de marketing
dixital Galinus, asentada en Corcubión dende hai 8 anos, a encargada de
organizar este encontro gastronómico no que persoas do eido da tecnoloxía, a
comunicación, a Internet e o emprendemento tecnolóxico xuntaranse nun xantar
informal que busca servir de foro para a posta en común de recursos e
proxectos. Para non repetir a experiencia de setembro de 2011, o vindeiro
venres a organización opta pola terra, e tras o xantar no restaurante Praia de Quenxe de Corcubión, poderase participar
nunha excursión que partirá en autobús da vila de San Marcos para ver de preto
a Fervenza do Ézaro, coñecer algunha das lendas do Monte Pindo, e gozar do
solpor dende a ensenada de Carnota, coa silueta do Promontorio Nerium como
protagonista. A visita será guiada por especialistas da historia da Costa da
Morte. A xornada rematará cunha Foliada no restaurante Praia de Quenxe, á que
acudirán coñecidos músicos da comarca de Fisterra.
A LaconNetwork está aberta a quen desexe participar deste encontro, sendo
preciso confirmar antes
asistencia a través da súa páxina web (que como novidade, nesta ocasión permite
realizar o pagamento do xantar e da excursión posterior, se procede).