O TEDxGalicia deixou a súa pegada na Tecnópole

luns, 3 de decembro do 2012 Marcus Fernández

O humor de Vicente de Souza amenizou a xornada ourensá do TEDxGalicia

Tras dúas edicións en Santiago de Compostela, o TEDxGalicia trasladouse o pasado venres a Ourense, concretamente ás instalacións da Tecnópole en San Cibrao das Viñas para celebrar o 20º aniversario deste parque tecnolóxico. O encontro conseguiu congregar a un numeroso público incondicional deste tipo de eventos, nos que o sector TIC está especialmente presente, incluso entre as entidades colaboradoras entre as que podemos destacar ao centro Gradiant, a Signo e Blusens, aproveitando esta última compañía para amosar aos asistentes o seu web:tv e un novo tablet con Android que chega como unha interesante alternativa ao iPad 2.

Marcos Pérez é a alma mater deste encontro que xa leva 3 edicións na nosa comunidade autónoma

A posta en escena desta edición de TEDxGalicia recaeu en Marcos Pérez Gulín, un dos principais organizadores do encontro, que contou co apoio do xenial Vicente de Souza, que co seu humor amenizou a xornada, e con toque musical achegado por parte do chelista Carlos García, a coreógrafa e bailarina Silvia Miramontes e os violonchelos do Soncello Quartet.
A xornada repartiu os seus relatorios en 4 bloques, comezando o primeiro dos mesmos co enxeñeiro de telecomunicacións Ricardo Capilla, quen tivo a ben realizar un discurso sobre a necesidade de ser distintos, para premiar o talento e non a mediocridade; a especialista en innovación cultural e museística e en didáctica científica especializada Mónica Moure (Ceo Aberto) comezou o seu relatorio lanzando caramelos ao público para falar do azar, a confianza e as oportunidades, instando tamén a ter unha actitude activa e gozar do traballo, mellorar o mundo e xerar riqueza; o creativo Miguel Castro (Enyiris) reflexionou sobre numerosos aspectos entre os que podemos destacar a revolución que supoño a Internet; pero o máis destacable de toda a xornada para moitos foi Pablo Carpintero, unha figura peculiar que sendo doutor en Ciencias pola USC optou por orientar boa parte da súa actividade á recuperación do patrimonio cultural inmaterial de Galicia, de xeito que hoxe resulta máis visible a súa face de artesán e gaiteiro, que serve de exemplo dunha vida na que se pode pór a paixón sobre todo o demais; pechou o primeiro bloque o autor do libro Ser feliz no implica ser idiota, Javier Cebreiros (InfoJC), que chamou á orixinalidade e repasou algúns dos principais erros cometidos nos actos de comunicación.

Nacho Iglesias defendeu a profesionailidade e paixón dos árbitros de fútbol

O segundo bloque de relatorios de 18 minutos de duración cada un principiou co piloto de Fórmula 2 e 3 José Luís Abadín, que tomando como base a súa biografía quixo animar aos asistentes a perseguir os seus soños; a deseñadora industrial Marta Falcón defendeu a importancia do deseño como fío condutor entre persoas e espazos; o árbitro de fútbol de Primeira División Nacho Iglesias conseguiu callar no auditorio deixando claro que a súa profesión practícase con paixón e dedicación, intentando deixar constancia de que os árbitros son persoas; o empresario Marcos Rodríguez (Formato Verde) destacou a importancia de aproveitar as crises para reinventarse constantemente; e o profesor Jorge Mira, cun certo toque de humor, falou sobre o sexo e a selección natural.

Carlota Sánchez puxo a vista en 2020 no seu relatorio

A terceira quenda de intervencións comezou co asesor en comunicación política Santiago Martínez, quen quixo expor algunhas das chaves da manipulación que se exerce sobre a cidadanía co mero uso das palabras; a directiva Carlota Sánchez quixo botar unha vista ao futuro, concretamente ao ano 2020, deixando unha certa mensaxe de optimismo; o avogado José Manuel Pérez reflexionou sobre temas como o software libre e a evolución tecnolóxica; e a compositora e cantante Patricia Moon ilustra sobre o traballo dos músicos.

Diego González explicou como chegou a desenvolver unha innovadora técnica cirúrxica que cada día ten maior aceptación a nivel mundial

A última serie de relatorios comezou co empresario e profesor universitario Andrés Mazaira, que destacou a importancia de personalizar a publicidade e engadir valor aos produtos e servizos para poder achegarse aos clientes; o cirurxián Diego González explicou como chegou a desenvolver un método pioneiro de operar o cancro de pulmón coa mínima invasión posible no que considera que será só o comezo de toda unha tendencia que facilite a recuperación das intervencións cirúrxicas; e, para completar este variado evento, a mestra Fátima García abordou o tema da discapacidade, dando a entender que todos temos que recorrer a apoios para realizar algunhas funcións, de xeito que debemos asumir as nosas eivas e as dos demais con normalidade.

Un total de 17 relatores completaron o programa deste edición do TEDxGalicia
Pablo Carpintero falou da importancia do noso patrimonio cultural e reivindicou a súa paixón pola gaita
A manipulación a través da comunicación centrou a intervención de Santiago Martínez
O profesor Jorge Mira falou de sexo e evolución no salón de actos da Tecnópole
Javier Cebreiros enumerou os 3 principais erros da comunicación no seu relatorio
Mónica Moure logrou conectar coa audiencia comezando a súa intervención lanzando caramelos ao público, o que serviu de base para varias reflexións
Patricia Moon interpretou unha canción en directo para explicar o traballo dos músicos

Publicamos unha completa galería fotográfica do evento na nosa páxina de Facebook.

PUBLICIDADE