Windows Phone consolídase como segunda plataforma móbil na India

A guerra dos sistemas operativos móbiles continúa con forza nos últimos meses, e aínda que Android pode considerarse como o grande triunfador global, agora xa non só hai pugna polo terceiro porto (perdido por BlackBerry hai bastantes meses) senón que a segunda posición xa non é exclusiva de iPhone en todos os mercados, e como exemplo diso temos que no informe para o segundo trimestre do ano para o mercado asiático IDC revela que Windows Phone é a segunda plataforma móbil na India por terceiro trimestre consecutivo, cunha cota de mercado do 5,4% e experimentando un crecemento trimestral do 60%.
Windows Phone 8 chegou á India hai menos de 10 meses, polo que a situación actual considérase todo un éxito, especialmente na familia Lumia, que consegue importantes vendas neste mercado emerxente, en boa medida grazas ao Lumia 520, terminal moi asumible, que segue a achegar unha boa experiencia de uso.
Aparte da fortaleza de Windows Phone por méritos propios tamén habería que indicar que Apple non consegue unha boa penetración no mercado indio porque os seus móbiles non están dispoñibles alí a través de operadores móbiles (senón que hai que adquirilos no mercado libre).