Media Markt prepara importantes ofertas para celebrar os seus 15 anos de actividade en España

Media Markt, recentemente de actualidade na nosa terra por ter aberto unha nova sede galega en Ferrol e tamén polo proceso de liquidación de existencias ao que se viu abocada a cadea na Coruña por mor do peche de Dolce Vita, vén de poñernos ao tanto sobre unha celebración a ter en conta, e máis se vai vir (como se supón) acompañada de ofertas e descontos. Máis polo miúdo, trátase da celebración este ano 2014 do seu 15 aniversario de actividade no territorio estatal, cousa que se dá a coñecer uns meses despois do nomeamento de Ferran Reverter, o primeiro CEO español da compañía no territorio español.
“Estes 15 anos de traxectoria no país”, sinalan fontes da compañía xermana de distribución de electrónica de consumo, “transmiten a gran aposta de Media Markt polo mercado estatal, sobre o que se realizou un gran esforzo de desenvolvemento de espallamento e polo que se apostou intensamente desde o inicio da súa actividade”. Lembrar que a compañía ten arestora 72 tendas repartidas en toda a xeografía estatal, estando catro delas na nosa terra: a de Lugo, a de Ferrol, a de Coruña (ata o de agora no centro comercial Dolce Vita) e a de Vigo.
Para celebrar estes 15 anos de “éxitos”, Media Markt preparou diferentes accións e descontos que, en palabras dos responsables da cadea, “resultarán irrepetibles e sorprenderán aos clientes de toda España para agradecer a confianza depositada na marca durante todo este tempo”. Ferran Reverter comenta ao fío desta conmemoración que dende a compañía “fomos quen de aprender moito e adquirir unha gran experiencia no mercado local a longo destes quince anos de actividade”. Ao seu xuízo, a empresa é un “exemplo a seguir pola súa excelencia operativa para moitos países europeos”.