Telefónica animou ás empresas galegas a subirse ao carro das metodoloxías 4.0

A Industria 4.0 é, ante todo, unha nova maneira de producir máis intelixente. Isto significa que xa non vale producir desbotando as vantaxes do participativo e do colaborativo, e tampouco vale pensar que imos dispor de recursos enerxéticos ilimitados. Asemade, e aínda que semelle un paradoxo, a Cuarta Revolución Industrial reivindica tamén a cultura do “faino ti mesmo”. Ou sexa a cultura maker, facendo compatible esta reivindicación do individual cunha defensa do cooperativo. Ademais, Industria 4.0 é inevitable: quen non se adapte vai sucumbir ao pouco tempo de comezar. Só así, asumíndoa e facéndoa evolucionar, solucionaremos o brete enerxético e industrial no que nos atopamos. Son palabras de Hugo Scagnetti, quen achegou hoxe un relatorio maxistral no marco das Xornadas de Industria Conectada 4.0 Tecnoloxías dixitais con impacto na industria que organiza en Santiago a operadora Telefónica.
O evento celebrouse esta mañá na sala Eisenman do Centro de Emprendemento da Cidade da Cultura de Galicia (Santiago de Compostela). O devandito relator, xerente de M2M de Telefónica España, centrou a súa intervención nas múltiples tecnoloxías 4.0 que están a transformar o ecosistema empresarial da nosa contorna, complementando esta aproximación ao smart cun percorrido histórico polas diversas revolucións tecnolóxicas que precederon a actual (un percorrido pola 1.0, a 2.0 e a 3.0, que é a que comezou en 1969 co afianzamento dos sistemas electrónicos de control e xestión e os primeiros pasos decididos da informática).
Segundo lembrou, o concepto 4.0 aséntase en 2011 e refírese en boa medida aos sistemas ciberfísicos, aos produtos intelixentes, á hiperconectividade, á Internet das Cousas e ao Coñecemento Masivo (Big Data). “Un dos seus meirandes retos”, sinalou, “é o a da eficacia”. Ou sexa, o de rematar co réxime de traballo de múltiples empresas afeitas a estragar grandes cantidades de enerxía en construír e fabricar cousas “que a xente non consume”, sinalou, facendo fincapé noutra das características da nova revolución industrial: tería capacidade, de ser ben xestionada e impulsada, para contrarrestar boa parte dos problemas medioambientais (exceso de gasto enerxético) ao que nos estamos a enfrontar.
Scagnetti tamén lembrou que queda moito por facer: hai moita xente que non sabe en que consiste minimamente o concepto de Industria 4.0, e só en Alemaña (líder neste ámbito) acádanse cotas salientables de coñecemento acerca disto. Tamén lembrou que nas grandes empresas hai máis información sobre as novas metodoloxías de traballo smart e sobre os seus principais obxectivos (optimizar custes de mantemento, mellorar a produción, prever e evitar riscos e fallos, traballar na seguridade na protección e na seguridade dos sistemas).

A xornada
O evento de hoxe veu da man de Telefónica e co obxectivo de debater sobre futuros materiais e tecnoloxías nas que poder centrar a súa actividade as nosas empresas. Falouse por exemplo do grafeno (para moitos especialistas o material protagonista da seguinte revolución tecnolóxica), da impresión en 3D ou da robótica colaborativa ao servizo da produtividade. A cita foi inaugurada, ao fío das 10.30 horas, Manuel Varela, director da Axencia Galega de Innovación (GAIN), e Manuel Ángel Alonso, director de Telefónica en Galicia, que coincidiron en salientar o importante potencial innovador e desenvolvedor do emprazamento no que se celebrou a xornada: o Centro de Emprendemento da Cidade da Cultura de Galicia, que acubilla entre outras o centro de crowdworking Telefónica Open Future, onde ducias das nosas novas empresas poñen a punto todo tipo de solucións e servizos innovadores no ámbito TIC. O obxectivo da xornada foi, sinalaron, “analizar a aplicación das tecnoloxías de última xeración na industria e valorar como están a transformar non só o modelo de negocio senón a forma de traballar nesta contorna”.
O núcleo da xornada artellouse en catro mesas de traballo dirixidas por expertos de prestixio neste tipo de tecnoloxías. Michael Loughlin, director de Nelmia Robotic Insight, coordinou a de robótica colaborativa e a súa pegada na produtividade; Javier Soria, de Telefónica Dixital Identity & Privacy, a de ciberseguridade e mecanismos de protección de datos en sistemas de información interconectados; Amaia Zurutuza, directora científica en Graphenea, experta en investigación e aplicación en grafeno, coordinou a adicada a este material; e Carlos Merchán, deseñador industrial de I+D de Telefónica, tutelou o debate sobre a aplicación da impresión 3D nos procesos produtivos.