A RAG comeza a envorcar o seu Arquivo na Rede

A Real Academia Galega atopou na Rede e nas súas vertentes e modalidades un vieiro para estar máis no mundo. Mesmo para envorcarse nel. Se no mes de abril falabamos en Código Cero dunha iniciativa de seu para celebrar a nosa lingua a través das TIC e nas escolas (a Primavera das Letras), á que cómpre sumar recursos previos como a web da RAG, o dicionario galego en liña ou o Portal das Palabras, agora a entidade vén de avanzar un pouco máis o roteiro de “dispoñibilizar” os seus tesouros. En termos concretos, a Academia abriu o catálogo do Arquivo de seu a través da Rede. Como resultado, xa podemos ter acceso hoxe a máis de 3.700 documentos dixitalizados.
Para isto, a entidade que preside Alonso Motero abriu unha nova xanela en liña específica, na que se irá dando a coñecer a totalidade dun catálogo integrado por 32.628 documentos ligados á historia de Galicia desde o século XI ata a actualidade. Segundo informa a RAG, “este servizo en liña ofrece ademais copias dixitais de case 3.750 destes documentos”.
A entidade explica que a iniciativa implicou a migración do rexistro descritivo do Arquivo de seu desde o antigo sistema de xestión á nova aplicación no contexto do proxecto Arquivo Dixital de Galicia (ARPAD), promovido polo Servizo Xeral de Arquivos da Xunta de Galicia. Ao fío disto, a RAG activou na súa páxina unha ligazón específica (academia.gal/arquivo-fondos) á web da devandita ferramenta, que dá acceso aos catálogos de máis de trinta arquivos de distintas institucións galegas. Estes trocos, engade a entidade galega, facilitarán a consulta dos fondos propios á comunidade investigadora e “a calquera persoa interesada na historia e a cultura galegas”. A idea da RAG, a maiores, é “avanzar no compromiso coa divulgación do legado preservado”.
Entre os fondos dixitalizados por completo, a Academia salienta o dos irmáns da Iglesia (que abrangue documentación relativa ao cerco da Coruña polos ingleses no ano 1589), o fondo de Xohán Vicente Viqueira e a colección fotográfica de Pablo Beade, con imaxes de 1932 a 1987 de actos e actividades da Federación de Sociedades Galegas de Arxentina.
O Arquivo, a maiores, prevé incorporar en datas vindeiras a colección de pergameos, con documentos de 1088 a 1756 de compravendas, foros, sentenzas xudiciais ou bulas.
A RAG tamén subliña o fornecemento da copia dixital de manuscritos de incalculable valor, como o poema Os pinos de Eduardo Pondel, a letra do no noso himno. Tamén se achega a obra teatral O Mariscal de Ramón Cabanillas e Antón Villar Ponte e de textos de Curros Enríquez, Fermín Bouza-Brey ou o padre Sarmiento; fotografías de Rosalía de Castro, Eduardo Pondal, Curros Enríquez e Marcial del Adalid; ou o tumbo de Caión (1582-1787).