Os parques tecnolóxicos estatais xuntaron forzas na Tecnópole

A semana pasada xuntáronse na Tecnópole de Ourense, en asemblea xeral, os máis de medio cento de representantes da Asociación de Parques Científicos e Tecnolóxicos de España (APTE). A cita, na que participou a directora da Axencia Galega de Innovación (amais de conselleira delegada da Tecnópole), Patricia Argerey, encadrouse no programa de actividades de celebración dos 25 anos do Parque Tecnolóxico de Galicia. Por este motivo, Argerey fixo reconto dalgúns dos principais fitos acadados ao longo deste cuarto de século de andaina: a celebración de dúas conferencias mundiais, o acollemento actual de 300 empresas e centros de coñecemento ou a posta en marcha de Agrobiotech, a aceleradora de innovación de PEME do sector agroalimentario, biotecnolóxico e da biomasa. Tamén lembrou os importantes fitos acadados por empresas tecnolóxicas concretas.
Por exemplo as firmas tecnolóxico-dixitais EGATEL (a empresa que acadou a máxima puntuación no índice Innobench, que é o termómetro da posición innovadora das compañías galegas) ou Xesol Innovación (que presentou recentemente un innovador sistema autónomo de asistencia á condución, do que falamos polo miúdo en Código Cero, e que está valorada en 230 millóns de euros).
Despois da benvida de Argerey e do presidente de APTE, Felipe Romera, os representantes de parques reunidos na Tecnópole e a directiva da asociación puxeron en común os temas relativos á xestión da entidade e as accións conxuntas a emprender nos vindeiros meses. Logo, realizaron unha visita a dúas das empresas da Tecnópole, COASA e EGATEL.
Segundo os datos presentados na asemblea, os 66 parques membros da APTE suman un total de 7.778 empresas e xeran un total de 161.343 empregos, dos que 30.269 se corresponden con profesionais especializados en tarefas de investigación e desenvolvemento (I+D).