Smarttek adiantará as prestacións do seu robot corta-céspede na Radio Galega

O programa Banda Ancha da Radio Galega, recentemente galardoado co Premio Especial EGANET, contará este sábado coa presenza do conselleiro delegado de Smarttek, José Manuel Ruiz Pérez, quen falará dos proxectos que está a desenvolver a súa compañía, entre os que destaca a SmartBot, un robot corta-céspede que sairá á venda o vindeiro 15 de marzo a un prezo de 1.429 euros e que contará con numerosas funcionalidades avanzadas integradas graza á grande experiencia en sensorización dos profesionais detrás deste atractivo produto do que dimos conta hai poucas semanas.
Na entrega desta semana do programa de tecnoloxía da Radio Galega tamén contarase coa actriz Raquel Espada, protagonista da serie de televisión O Faro, quen dará conta dos seus primeiros contactos coa tecnoloxía e o uso que actualmente fai das TIC. Completarán o programa a habitual sección de novas elaborada en colaboración con Código Cero e a participación de Pablo Grandío, de Vandal.net, para comentar o último do sector dos videoxogos.
O espazo radiofónico poderá escoitarse este sábado na Radio Galega entre as 15:00 e as 16:00 horas (ou posteriormente a través do servizo de programación á carta da CRTVG).