A CNMC require a cinco influentes por non identificar correctamente a publicidade nos seus vídeos

A Comisión Nacional dos Mercados e da Competencia (CNMC) aprobou cinco requirimentos dirixidos a usuarios de especial relevancia (influentes) por incumprimentos na identificación de comunicacións comerciais en redes sociais. As actuacións afectan ás contas de Sofía Suescun, Tamara Gorro, Peldanyos, Samy Spain e Lola Lolita, tras varias denuncias presentadas pola Asociación de Usuarios da Comunicación (AUC).
Segundo a CNMC, os contidos analizados promocionaban distintos produtos e servizos, entre eles unha tarxeta bancaria, alimentos, establecementos de restauración, pezas de roupa ou contidos audiovisuais, sen incorporar unha advertencia suficientemente clara dentro do propio vídeo que permitise aos usuarios identificar o seu carácter publicitario.
Nalgúns casos empregáronse expresións como ad, referencias ao papel de embaixadora dunha marca, ferramentas de etiquetaxe das propias plataformas ou indicacións como #publi situadas fóra do vídeo. Con todo, o organismo considera que estas medidas non cumpren os requisitos esixidos cando a advertencia non aparece integrada de forma visible no contido audiovisual. A CNMC lembra que o seu criterio interpretativo, aprobado o 4 de xuño de 2025, establece que a identificación correcta deste tipo de comunicacións debe realizarse mediante termos claros como publicidade ou publi inseridos no propio vídeo.
Un dos expedientes, correspondente a Lola Lolita, aborda ademais a consideración dun contido como comunicación comercial aínda que non exista unha contraprestación económica directa. Tanto a creadora de contido como a marca defendían que a publicación non tiña carácter publicitario ao non estar remunerada nin contemplada nun contrato. Porén, a CNMC concluíu que o vídeo incluía elementos que contribuían á promoción da marca e que, polo tanto, debía ser considerado unha comunicación comercial.
O organismo lembra que a xurisprudencia española e europea recoñece a existencia dunha finalidade publicitaria mesmo en ausencia de pagamento directo e incluso cando a promoción se realiza por iniciativa propia do creador de contido.
A CNMC decidiu non iniciar procedementos sancionadores ao considerar que as publicacións investigadas foran difundidas antes da consolidación do seu criterio interpretativo en xuño de 2025. En lugar diso, optou por requirir aos influentes que adapten a súa actividade ás obrigas previstas na normativa audiovisual.
O caso de Sofía Suescun incorpora ademais cuestións relacionadas coa publicidade de produtos con efectos sobre a saúde. A resolución conclúe que a publicación examinada incluía declaracións sobre os beneficios dun complemento alimenticio que non están autorizadas pola normativa europea, polo que a considera publicidade ilícita.
A CNMC subliña tamén que os influentes están sometidos ás disposicións específicas sobre publicidade sanitaria, entre elas a prohibición de empregar testemuños de persoas famosas ou coñecidas para promocionar este tipo de produtos.
Como autoridade responsable da supervisión da Lei Xeral de Comunicación Audiovisual, a CNMC vixía o cumprimento das obrigas dos prestadores audiovisuais e dos usuarios de especial relevancia que operan en plataformas de intercambio de vídeos. Entre as súas funcións figura garantir que os usuarios poidan distinguir con claridade cando un contido ten unha finalidade publicitaria.