A Casa dos Poetas tira partido das redes sociais para achegarse á mocidade galega
martes, 26 de abril do 2011
A Fundación
Curros Enríquez, con sede na Casa dos Poetas de Celanova, apuntouse nesta
recta final de abril ás novas tendencias da comunicación que se impoñen: as que
animan á participación directa de tódolos destinatarios dos datos que se
emiten. De feito, podemos ver xa a presenza da entidade cultural nas redes
sociais Twitter e Tuenti, que cómpre sumar á incorporación o ano pasado á rede
social Facebook, onde a Fundación ten máis de 1.200 amizades.
“Coa incorporación a estas plataformas”,
informan dende a entidade, “preténdese
aumentar o número de destinatarios de información das actividades e novidades
da Casa dos Poetas, ademais de difundir a poesía de Celanova sen límites xeográficos”.
Máis polo miúdo, o gran obxectivo da Fundación é favorecer o achegamento á
mocidade, que a fin de contas é a principal usuaria das devanditas reces
sociais, e tamén, a gran destinataria dunha boa parte das actividades que se
levan a cabo na Casa dos Poetas, sede do ente cultural. De feito, a franxa de
idade maioritaria nos grupos atendidos no dito inmoble cultural é de entre os
14 e os 17 anos, rapaces que comezan o seu achegamento á literatura ou que
complementan coa visita e as lecturas poéticas guiadas os coñecementos
adquiridos nas aulas.