A Cruz Vermella e Televés reciben o pulo da Xunta para desenvolver servizos innovadores de teleasistencia
mércores, 19 de xullo do 2017
Televés e a Cruz Vermella levan tempo traballando
xuntas no camiño de mellorar a asistencia de persoas en dependencia.
Os froitos do seu labor compartido foron recoñecidos recentemente
polo Colexio Profesional de Enxeñaría en Informática de Galicia,
CPEIG, que lles concedeu o Premio eInclusión polo seu servizo de
atención a distancia para persoas maiores ou dependentes, unha
plataforma a prol do envellecemento activo con capacidade de
seguimento avanzado e de resposta inmediata fronte a emerxencias,
amais de estar operativa as 24 horas do día. Agora, a este labor
conxunto da Cruz Vermella e de Televés véñenlle de saír dous
novos aliados firmes (alén do apoio orzamentario previo da propia
Xunta). Por
unha banda a Consellería de Política Social e, pola outra, a
Axencia para a Modernización Tecnolóxica de Galicia (AMTEGA).
Segundo fixeron saber onte os responsábeis de ámbalas entidades, a
súa colaboración materializarase “no apoio á pilotaxe de novas
prestacións de fogar dixital sociosanitario no marco do proxecto
europeo Activage, que busca crear solucións tecnolóxicas que
favorezan a independencia e autonomía das persoas maiores”.
No marco deste proxecto en Galicia, engadiron,
desenvolveranse e probaranse solucións de fogar dixital
sociosanitario con 700 usuarios, 100 deles con necesidades puramente
clínicas, 450 usuarios de prestacións sociais, e 150 con
necesidades sociosanitarias.
Tamén explicaron na formalización da alianza que a
pilotaxe de diferentes solucións en función dos perfís permitirá
sentar os alicerces “dunha futura carteira de servizos sociais
prestados desde o fogar”. Cousas como, por exemplo, coidado
integral para os adultos de idade avanzada con doenzas crónicas, o
seguimento da actividade diaria, a achega de solucións de seguridade
e confort en casa, o subministro de estimulación cognitiva ou de
prevención do illamento social, etc.
Nun plano máis concreto, a Consellería de Política
Social e Cruz Vermella sinalaron que fornecerán á iniciativa do
perfil e das necesidades dos posíbeis usuarios do ámbito social
mentres que Televés proporcionará o desenvolvemento das solucións
tecnolóxicas a través de tecnoloxía IoT (internet das Cousas).
Todo iso recóllese no convenio de colaboración
asinado este 18 de xullo entre o conselleiro de Política Social,
José Manuel Rey; a directora da AMTEGA, Mar Pereira; o director
xeral da Corporación Televés, Santiago Rey e a presidenta
autonómica de Cruz Vermella, María del Carmen Colmeiro.
José Manuel Rey manifestou que “esta medida
afondará na mellora da colaboración e a coordinación entre
administracións e empresas en beneficio dos galegos e galegas” e
lembrou que a día de hoxe, a Xunta de Galicia oferta a través de
Cruz Vermella 5520 dispositivos de teleasistencia e 240 dispositivos
xeolocalizadores. Tamén salientou, acerca das vantaxes concretas
destas tecnoloxías, “a importancia da tranquilidade do usuario ou
da súa familia sabendo que pode ser atendido nunha situación
crítica a través dun botón de alarma”.
Coa sinatura deste convenio formalízase a adhesión
da área social autonómica ao proxecto europeo Activage, do que xa é
partícipe o SERGAS, para avanzar en solucións tecnolóxicas que
dean resposta ao modelo de teleasistencia avanzada no fogar polo que
aposta a Xunta de Galicia.
No acto de presentación do acordo coa Cruz Vermella
e con Televés, recordouse que “a Administración autonómica está
a traballar nun modelo de teleasistencia avanzada para prestar tanto
servizos asistenciais a doentes crónicos como a monitoraxe continua
de persoas maiores no seu fogar para identificar situacións de risco
de forma automática e comunicalas de maneira telemática aos seus
coidadores ou fornecedores de servizos”. Este modelo, engadiron Rey
e Pereira, baséase nun único sistema tecnolóxico para os servizos
sociais e sanitarios no fogar, sobre o que traballarán diferentes
fornecedores de servizos en cada un dos ámbitos.
Proxecto europeo
Activage é un proxecto financiado pola Comisión
Europea no marco do programa Horizonte 2020, que se levará a cabo en
7 países. Cun orzamento de 25,3 millóns de euros e un prazo de
execución de 42 meses, o seu obxectivo é facer fronte ao reto que
supón o envellecemento da poboación. En Galicia a iniciativa está
liderada pola compañía compostelá Televés, unha das 50 empresas
europeas que participan no proxecto para construír unha plataforma
aberta e interoperábel baseada na Internet das Cousas (IoT) e para
dar forma a solucións que favorezan a autonomía e a calidade de
vida das persoas maiores. Na iniciativa colaboran coa compañía como
socios do proxecto Cruz Vermella, Fundación Vodafone,
Fundación Tecsos, Universitat Politècnica de Valencia e o Servizo
Galego de Saúde (SERGAS).
Na presentación deste 18 de xullo fíxose fincapé
en que o piloto, que lidera Televés, servirá “para incrementar a
interoperabilidade das solucións desenvolvidas coas principais
plataformas da Internet das Cousas, reforzando aspectos como a
seguridade, o intercambio de información entre os fogares das
persoas que necesitan coidados e os centros asistenciais, a mellora
da facilidade de uso dos dispositivos, ou a integración coas redes
de telecomunicación despregadas no fogar”.