A Deputacion de Lugo remodela o seu Centro de Procesamento de Datos
venres, 17 de agosto do 2018
O
Goberno da Deputación de Lugo presentou hoxe un importante avance en
materia de modernización tecnolóxica das súas propias estruturas,
infraestruturas e procedementos de xestión e comunicación. Estamos
a falar da remodelación do Centro de Proceso de Datos da entidade
provincial, que foi dada a coñecer polo deputado de Innovación e
Participación Cidadá, Pablo Rivera Capón, quen antes de
debullar os detalles do labor de posta a punto lembrou aos medios a
importancia crucial do Centro para a a Deputación: trátase, dixo do
“servidor físico no que se executan a maior parte das aplicacións
e sistemas informáticos que se empregan dende a Administración
provincial así como dende os Concellos”.
Rivera
explicou que o Executivo Provincial aprobou este venres en xunta de
Goberno un orzamento de 250.000 euros para realizar obras coas que
“actualizar este servidor aos novos tempos”. A previsión,
engadiu, é rematalas en catro meses.
Asemade,
fixo un repaso pola historia e os fitos do CPD, un recurso
tecnolóxico centralizador que comezou a súa andaina en 2010,
“servindo de gran axuda para a transformación tecnolóxica que
sufriron tanto á Administración provincial coma os Concellos”,
aos que “lles ofrecemos durante todo este tempo novos servizos
TIC”.
Segundo
engadiu, logo destes 8 anos, a evolución da propia tecnoloxía, por
unha banda, e o aumento dos traballos dende a Administración
Electrónica, pola outra, fixo necesario mellorar o CPD para facelo
“máis eficiente, eficaz e tamén máis seguro”.
Entre
os cometidos principais do centro, atópanse os seguintes: soportar
as páxinas web dos Concellos, os portais de transparencia, os
sistemas de eAdministración, a telefonía, o acceso a Internet, ou
as aplicacións de contabilidade e de xestión de recursos humanos.
“Coas melloras aplicadas agora”, engadiu o deputado,
“reforzaranse as bases de datos, poñendo especial atención na
actualización da información e no impulso de medidas de seguridade,
dos sistemas de control, da prevención de erros e dos sistemas de
recuperación”, co obxectivo último de “protexer a información
da Deputación de Lugo”. Amais, puntualizou, ampliarase a
capacidade de almacenamento e procesado e actualizaranse parte dos
equipos e dispositivos físicos por outros máis modernos, eficaces e
fiábeis.
O
deputado de Innovación e Participación Cidadá avanzou que o CPD
soportará tamén a nova web da Deputación, que “está
practicamente lista” e que podería darse a coñecer o vindeiro
mes. “Será unha páxina mais atractiva visualmente, cun maior grao
de usabilidade e accesibilidade, máis interactiva e rápida”,
explicou.
Por
outra banda, Rivera Capón lembrou que ao abeiro do compromiso pola
evolución nas tecnoloxías da información na provincia de Lugo, o
Goberno da Deputación puxo á disposición dos Concellos (por
terceiro ano consecutivo) axudas para o impulso da Administración
Electrónica e protección de datos dos municipios, por valor de
139.000 euros. “Isto”, dixo, “permitirá realizar melloras
tecnolóxicas en 23 consistorios lucenses, que foron os que decidiron
sumarse a esta liña da Deputación”. Ao abeiro destes apoios á
gobernabilidade electrónica, optimizaranse, manteranse ou crearanse
proxectos locais de eAdministración e faranse adaptacións sobre
protección e almacenamento de datos.
Amais,
Rivera Capón explicou que “medidas como a que hoxe aprobamos,
aínda que parezan moi técnicas, o que demostran é que esta
Deputación continúa a evolucionar, adaptándose aos novos tempos e
promovendo un uso cada vez maior da tecnoloxía, tanto no traballo
diario dos profesionais que prestan os seus servizos na entidade
provincial, como na vida cotiá dos nosos veciños, cumprindo coa
lexislación, e promovendo, por exemplo, a administración e rexistro
electrónico nos Concellos”.
O
deputado rematou recordando que a institución lucense é a única
deputación galega que conta coa ISO 20.000-1, que é unha
certificación que garante a calidade dos servizos de xestión
informática que ofrece a Deputación a nivel interno, así como á
cidadanía e ás entidades locais, apuntou.