A Deputación de Ourense achega aos concellos un sistema Blockchain para xuntanzas a distancia con validez legal
mércores, 2 de outubro do 2019
A
Deputación de Ourense presentou a semana pasada un servizo avanzado
para o desenvolvemento de xuntanzas a distancia e con validez legal.
Trátase, en palabras da entidade provincial, dunha solución
tecnolóxica pioneira, gratuíta para todos os concellos (agás o da
capital) e que “contribuirá a mellorar a transparencia na
xestión”. O
sistema foi dado a coñecer polo presidente Manuel Baltar e
responsábel da Área de Transparencia e Goberno Aberto da
Deputación, Fernando Suárez. Segundo fixeron saber, baséase na
tecnoloxía de cadea de bloques (Blockchain), que consiste no
fornecemento de libros de contabilidade electrónicos para seren
compartidos abertamente por moreas de usuarios e que gravan todas as
transaccións que se apuntan neles e sen que haxa xeito de
modificalas. En base a isto, o Blockchain salienta pola
seguridade e pola dispoñibilidade da información.
O
sistema foi presentado este 28 de setembro, coincidindo co Día
Internacional do Dereito de Acceso Universal á Información. Na
cita, o presidente da Deputación de Ourense, Manuel Baltar, destacou
o concepto de transparencia como “unha das liñas destacadas” da
súa estratexia política e de xestión pública, unha estratexia que
está a coller impulso grazas á estreita colaboración cos concellos
da provincia. Nesta liña tecnolóxica e de cooperación municipal
insírese precisamente o servizo de gravación de plenos Councilbox,
en palabras de Suárez e Baltar “unha plataforma na nube para a
celebración presencial e en remoto de reunións con validez legal”.
Segundo
engadiron, a característica diferencial deste sistema é que inclúe
a tecnoloxía Blockchain, que “permite a xestión de
reunións e comisións con videoconferencia certificada”,
tecnoloxía que xa foi empregada pola Deputación de Ourense na súa
aplicación no pazo provincial e que demostrou importantes vantaxes
de automatización, seguridade xurídica e axilidade no traballo
(facilita a realización de reunións a distancia reducindo custes e
desprazamentos).
Entre
as súas funcionalidades destaca a xestión de convocatoria de
xuntas, plenos e reunións; a automatización do voto delegado; o
control de asistencia; a administración das xuntas; documentación
de sinaturas, actas e libros de actas; certificación e custodia de
evidencias; creación de actas automáticas; xeración de
certificados de tomas de acordos; e gravación dos plenos.