A Deputación de Ourense e a CEO lanzan un programa de apoio dixital para a busca de novos mercados
martes, 21 de novembro do 2017
Este
20 de novembro presentouse en Ourense un programa de apoio dixital
para as empresas da provincia que queiran abrir mercado e espallar
actividade noutros países. A iniciativa, inserida no Plan
ExportOU, foi dada a coñecer nos seus detalles polo presidente da
Deputación, Manuel Baltar, o presidente da Confederación
Empresarial de Ourense, José Manuel Pérez Canal e o director da
empresa de novas tecnoloxías Contatc Comunicación, César González.
A plataforma dixital de programa ExportOU, impulsada pola Deputación
e a CEO, dispoñibilizará en Internet un completo catálogo de
empresas ourensás, as cales poderán recibir asesoramento no marco
do programa de desenvolvemento dixital.
O
presidente da Deputación aproveitou a oportunidade para facer un
percorrido por diversos éxitos de espallamento comercial liderados
por empresas locais, un camiño, o da internacionalización, “que
moitas outras poderán seguir con estas ferramentas de apoio á
exportación que hoxe presentamos, que serán un instrumento de
planificación, optimización, estudo e posicionamento”.
Pérez
Canal definiu a plataforma dixital ExportOU como unha xanela “ao
mundo dende a nosa provincia”, e César González explicou que o
portal achegará información de empresas, produtos e servizos,
ademais de fontes de financiamento, programas formativos, novas e
eventos relacionados coa internacionalización.
Xunto
á plataforma, presentouse o Programa de Dixitalización para a
Internacionalización de Empresas de Ourense, que permitirá, en
palabras dos representantes das ditas entidades, “acompañar ás
firmas participantes no seu camiño exportador desde o primeiro
momento” e tamén fortalecer a aquelas que xa iniciaran a súa
aventura comercial no exterior, por medio de estudos personalizados
de desenvolvemento dixital (destinados a coñecer o estado de cada
empresa na Rede); realización de plans de traballo e imaxe
corporativa e posicionamento en redes sociais, así como análise de
resultados de internacionalización.
O
programa ExportOU é unha iniciativa froito do convenio de
colaboración entre a Deputación e a CEO coa finalidade de difundir
internacionalmente a Marca Ourense e favorecer aperturas de novos
mercados para as empresas da provincia.