A Dirección Xeral de Comunicación Audiovisual abre o prazo de inscrición do seu curso sobre vídeo na Rede

Internet non só lle abre novas canles de expresión a xornalistas, escritores e, en xeral a toda aquela persoa que teña algo que dicir pero que non queira (ou non poida) contar con xornais ou editoriais como mediadores.
Tamén abre interesantes vieiros para a expresión audiovisual, sobre todo no que se refire a curtametraxes (máis sinxelas de pendurar e distribuír ó mundo enteiro). Informar en todo que sexa posible deste último punto é o obxectivo do curso Vídeo na Internet que está a organizar a Dirección Xeral de Comunicación Audiovisual e que abre hoxe luns 18 o seu prazo de inscrición para o público en xeral.
Os interesados poden darse de alta a través da web do Centro Multimedia de Galicia ou ben por medio do seguinte número de teléfono: 981 545 062. O curso, que se desenvolverá do 15 de xaneiro ó 8 de febreiro, xirará arredor de cuestións como os cambios que leva consigo a integración do vídeo na Web ou os que afectan a procesos como os de produción e posprodución ou á mesma linguaxe audiovisual en si mesma.
Segundo informa a Dirección Xeral, a actividade formativa (de 45 horas), conta cunhas horas de titorías e unhas horas dedicadas á formación. Nas horas de titorías os alumnos poderán comunicarse co profesor a través de videoconferencia ou do chat e resolver todo tipo de dúbidas nas horas marcadas para as titorías. Durante as clases prácticas os alumnos elaborarán unha peza audiovisual que subirán despois ao portal audiovisualdegalicia.es da Dirección Xeral de Comunicación Audiovisual.