A Escola de Telecomunicación introducirá en ciberseguridade aos nosos estudantes e profesionais
xoves, 18 de maio do 2017
A Escola de Enxeñaría de Telecomunicación de
Vigo vai organizar entre xuño e xullo unha actividade formativa moi
indicada para os tempos que corren, aínda coas consecuencias
recentes do virus WannaCry e as múltiples incidencias
mundiais provocadas polo seu espallamento (a día 15 de maio, 230.000
equipos infectados dun total 180 países). Falamos
do curso Introdución á ciberseguridade, que se vai
desenvolver no dito centro vigués entre o 1 de xuño e o 20 de xullo
e que, segundo informa a Escola, xa ten arestora aberto o seu prazo
de preinscrición e matrícula (a disposición do alumnado
universitario e dos nosos profesionais). O curso, que será
presencial e en horario de tarde (xoves e venres), abrangue 44 horas
de formación.
Segundo informa a organización acerca dos
obxectivos do obradoiro, “a ciberseguridade é, ao abeiro das TIC,
un dos eidos que máis está a medrar e que máis se prevé que creza
e demande profesionais nos vindeiros anos”. Polo tanto, a
finalidade do curso é dotar “ao alumnado dunha visión de conxunto
dos diferentes aspectos que conforman a protección dixital e das
diversas saídas profesionais que permite”.
Contarase coa presenza de Alberto Diaz (xefe de
Produto en R Cable, que falará de como coñecer e entender os
principais conceptos e termos empregados na ciberseguridade), Iago
Fortes (propietario de Inprosec, que introducirá ao alumnado no
goberno da seguridade da información), José Ramón García de
Searez (xefe de equipo do Servizo de Seguridade en DimensionData, que
afondará na arquitectura da protección dixital e máis en
tecnoloxías concretas para a seguridade), Eduardo Díaz Comellas
(propietario de Ultreia, que formará aos participantes en
metodoloxías para salvagardar redes e sistemas), Andrés Tarasco
(director de Tarlogic, que amosará como auditar a
seguridade), Javier Berciano (do Instituto Nacional de Seguridade,
que exporá como xestionar un incidente), Carlos Manchado (xerente de
Risk Advisory IT & Ciber Risk Services e Deloitte, que se
centrará no desenvolvemento seguro de software), Susana Rey
(responsábel de Seguridade en R Cable, que fará un percorrido polos
aspectos legais ligados á ciberseguridade en España), Alberto
Zapico (Axencia Estatal de Administración Tributaria, que avaliará
a xestión da protección dixital nesta entidade) e Alberto del Hoyo
(responsábel de seguridade e desenvolvemento de negocio en
Accenture).