A Mesa celebra a aprobación no Parlamento da súa iniciativa Xabarín
mércores, 12 de maio do 2021
A
Mesa vén de emitir un comunicado no que expresa a súa satisfacción
pola aprobación no Parlamento da súa Iniciativa Popular Xabarín,
respaldada por máis de 33.000 persoas. Segundo fixo saber a
entidade, nun intre tan significativo como estes días previos á
festa das Letras Galegas, o Parlamento “deu un paso fundamental
para garantirmos o acceso a contidos audiovisuais en galego para
todos os públicos e, nomeadamente, para o infantil e xuvenil”.
A
Mesa salienta que “o enorme apoio popular recibido pola iniciativa
demostrou que existe unha grande demanda dunha canle temática para a
mocidade e a infancia na TVG, así como de contidos en galego nas
plataformas dixitais, onde só se poden ver en galego 25 series e
filmes dos máis de 25.000 títulos dispoñíbeis, e na propia
televisión pública estatal, que só emite na nosa lingua 39 minutos
de 120 horas”.
O
acordo aprobado este 12 por unanimidade por unanimidade dos partidos
políticos presentes na cámara galega contempla a creación dunha
canle Xabarín da TVG que emitirá para fibra óptica, ADSL, satélite
e telefonía móbil, mais tamén se reclama do goberno español
accións para garantir tanto en TVE como nas plataformas, a dobraxe,
lexendaxe e audiodescricións en galego así como financiamento para
as producións na nosa lingua dentro da Lei Xeral do Audiovisual que
será debatida nos próximos meses. “Isto”, explica A Mesa,
“converte o Parlamento galego no primeiro que se manifesta sobre
esta cuestión”.
Entrementres,
a iniciativa insta a chegar a acordos con operadoras e plataformas
para a dobraxe e lexendaxe das súas emisións así como a
posibilidade de reciprocidade na visualización con Portugal.
A
Mesa valora a aprobación como “un éxito colectivo da sociedade
galega”. E engade: “Centos de persoas voluntarias da Mesa pola
Normalización Lingüística, centos de estabelecementos nas difíceis
condicións impostas pola pandemia e, especialmente, as miles de
asinantes, lograron o primeiro grande acordo arredor da lingua galega
dos últimos 12 anos”.
Podemos
descargar o debate parlamentar nunha
ligazón específica habilitada.