A Policía detén a 6 veciños de Vigo por explotar licenzas de Microsoft
xoves, 24 de febreiro do 2011
Para quen non o
saiba, e malia os achegamentos cara ao software libre que está a levar a cabo,
Microsoft é unha empresa de software pechado. Polo tanto, quen teime aínda en
piratear os seus produtos (cousa que se podería evitar se os usuarios beneficiados de todo isto botasen man de
programas abertos, que hai bos e de abondo), corre o risco de levar algo máis
que un susto na porta do seu negocio. Segundo informa a multinacional de
Redmond, a loita contra o fornecemento ilegal dos seus produtos intensificouse
estes días coa detención de 23 persoas polo “uso e explotación ilegal de licenzas de software de Microsoft nos
equipos de informáticos de locutorios e cibers”. Dáse a circunstancia de
que a operación, levada
a cabo pola Policía Nacional, incluíu negocios de Vigo entre os
inspeccionados. Resultado: seis persoas da cidade imputadas.
Asemade,
abrangueu Málaga, Almería, Burgos e Talavera de la Reina. Ademais dos 23
arrestados, foron imputadas outras 22 persoas e practicáronse outras dúas
detencións por atentar contra dos dereitos dos traballadores, “ao atoparse en situación irregular e sen un
contrato de traballo axustado a Dereito”, informa Microsoft.
A investigación
tivo o seu xermolo en varias denuncias achegadas pola propia compañía contra
diversos establecementos de acceso ás redes por “empregar software ilegal nestes locais comerciais”. Previamente, a
multinacional enviara peritos e detectives privados a estes establecementos
sospeitosos de dar acubillo á copia masiva e non permitida de produtos informáticos,
visita que abrangueu máis de 600 cibers e locutorios. A continuación, foille
comunicada a estes negocios a posta en marcha do proceso, labor que levou a
cabo a empresa Sogelise e que segundo apunta a compañía de Windows
materializouse en varios requirimentos á legalización do software.
A xuízo da
empresa multinacional, os locutorios e cibers intervidos son os que fixeron
caso omiso das advertencias, polo que foron denunciados por un delito contra a
Propiedade Intelectual. En total, foron 45 os establecementos intervidos.