A UDC organiza este xoves unha editatona para incrementar a presenza feminina na Galipedia
mércores, 11 de marzo do 2020
Coincidindo
coa longa listaxe de actividades reivindicativas a prol da igualdade
e o recoñecemento das mulleres, actividades que culminaron este
domingo (Día Internacional da Muller Traballadora) e repuntaron días
antes co Días da Nena e a Muller na Ciencia e a Tecnoloxía, a
Universidade da Coruña, a través da Vicerreitoría de Igualdade,
Cultura e Deporte, está a organizar unha serie de accións que
buscan visualizar ao máximo a contribución feminina ao ámbito
STEM. Por
exemplo a cita deste xoves 12 na Facultade de Informática: unha
editatona para aumentar o número de mulleres na Wikipedia en
galego, a Galipedia.
Para
quen non o saiba, unha editatona é unha reunión de persoas
que se xuntan para editar na Wikipedia, tanto de forma presencial
como virtual. O propósito desta convocatoria é diminuír a fenda de
información dixital existente incorporando 50 novas mulleres
relevantes á Galipedia.
A
convocatoria de mañá será nos laboratorios 0.1 e 0.2 da Facultade
de Informática, ás 16:00 horas, cunha duración prevista de dúas
horas, nun obradoiro coordinado pola profesora Laura Castro. Baixo o
desafío de 50 mulleres máis na Galipedia farase primeiro unha breve
introdución á edición da Wikipedia en galego para despois
“proceder á edición de novos artigos sobre mulleres relevantes”,
informou a Vicerreitoría, dando
conta do sitio web específico desta xuntanza en concreto.