A canle en aberto Mega substituirá a GolT o vindeiro 1 de xullo

O panorama audiovisual español continúa a recibir cambios, e tras unha resintonización masiva que seguiu ao peche de varias canles, e a convocatoria dun novo concurso de licenzas de TDT, temos un cambio bastante máis leve, que limitarase unicamente aos contidos, pero que ten certa relevancia, pois supón a constatación do fracaso da TDT de pagamento en España.
Atresmedia confirma que a canle deportiva de pagamento GolT abandonará a súa canle de TDT este verán (pasando os seus contidos a integrarse na canle beIN Sports, que poderá verse a partires de agosto en plataformas de televisión de pagamento), e ao recuperar o programa decidiron cubrir o espazo con Mega, unha nova oferta de contidos en aberto que en grande medida busca aproveitar o oco deixado no mercado tras a desaparición de Nitro, Xplora e laSexta 3, ou sexa, que Mega tería como obxectivo un público masculino de entre 25 e 54 anos de idade.
Entre os contidos iniciais de Mega estarían series de televisión (Justified, Vikingos, Bonnnie and Clyde...) documentais (Cosmos, Un mundo en guerra...) e factuals (Empeños a lo bestia, Locos por los coches...), e a nova canle televisiva botaría a andar o vindeiro 1 de xullo.
O nacemento de Mega parece ser a lousa sobre a lápida da TDT de pagamento en España, que parecera dicir adeus en 2002 co peche de Quiero TV, pero que quixo atreverse a volver coas canles Gol Televisión, AXN e Canal+ Dos, que foron desaparecendo paulatinamente ante unha demanda ridícula por parte dos espectadores (que no caso de contratar contidos de pagamento optaban antes polo cable ou o satélite).

Vídeo de presentación de Mega