A educación dixital galega estenderase a 100.000 alumnas e alumnos
xoves, 21 de xaneiro do 2021
A
educación dixital na nosa terra, un ámbito de especial importancia
nas circunstancias actuais (nas que se fan precisos máis recursos
que favorezan a teleformación) vai chegar a 100.000 alumnas e
alumnos. Así
o fixo saber este xoves 21 o presidente do Goberno galego, Alberto
Núñez Feijóo, engadindo que a devandita cifra suporá o 70% dos
alumnos de 5º de primaria a 4º da ESO.
Feijóo
precisou que o Consello autorizou dous contratos marco que suman un
importe máximo de 34 millóns de euros: un deles para adquirir ata
45.000 ultraportátiles para o alumnado e o outro para adquirir o
equipamento necesario para a dotación doutras 2.000 aulas E-Dixgal.
Tamén
recordou que a día de hoxe E-Dixgal está dispoñíbel para os
centros adheridos, entre 5º de primaria e 2º da ESO. “Isto supón
que máis de 34.000 alumnos destes niveis educativos estudan con
libro dixital, equipados con portátil e con acceso online e
offline á plataforma virtual EVA, onde teñen á súa
disposición o contido curricular completo de cada curso”, dixo,
engadindo que os actuais fitos de transformación educativa teñen a
súa orixe en 2010, coa posta en marcha da iniciativa Abalar, na que
se levan investido máis de 100 millóns (para a dixitalización de
todas as aulas de 5º de primaria a bacharelato; para que o 100% dos
centros públicos educativos de Primaria e Secundaria dispoñan de
conexión superior a 100 Mbps; e, tamén, para a adquisición de
equipamento, contidos dixitais e implantación de novos servizos e
canles de comunicación online).