A enciclopedia virtual europea demora o seu lanzamento ata mediados de decembro

Esta semana tiña que arrincar Europeana como a gran enciclopedia virtual europea accesible a través da Internet, contando no seu inicio con 2 millóns de arquivos de todo tipo (entre cadros, fotografías e toda clase de documentos dixitalizados) achegados principalmente dos arquivos franceses (os máis dixitalizados de Europa) mentres que apenas o 1% dos contidos corresponden a España.
Pero este ambicioso proxecto que quere chegar aos 10 millóns de artigos en 2010 e conta cun orzamento de 450 millóns de euros (principalmente de xeito indirecto) non soubo empezar con bo pé, e ante a avalancha de usuarios interesados en botarlle unha ollada na súa estrea colapsouse o seu servidor web, polo que agora xa anuncian que non volverán a estar operativos ata mediados do mes de decembro.