A galega Probotec pon a robótica ao servizo das pemes alimentarias e da automoción

Sonia Peteado, nova directora de I+D de Probotec, e Hugo Barreiro, de ANFACO

Entre as firmas que están a ser apoiadas en materia de proxectos innovadores pola axencia GAIN e InnovaPEME (complementado con DeseñaPEME, os dous programas nas súas novas convocatorias achegando un orzamento de 2,8 millóns) atópase a empresa viguesa Probotec, firma de automatización e fabricación industrial que constitúe un caso de éxito salientábel ao abeiro do devandito programa autonómico, na súa edición de 2021.
Probotec é unha empresa especializada en automatización industrial. Comezou a súa andaina a inicios do ano 2000, ofrecendo solucións de programación robótica e hoxe en día xa subministra un servizo integral de automatización “chave en man” para sectores como a automoción ou o sector alimentario, entre outros. No pasado ano 2021 decidiron formalizar un plan de innovación, creando un departamento destinado a este obxectivo. O plan buscan incrementar a súa competitividade especialmente no sector alimentario e desenvolver novos produtos e servizos innovadores. En concreto o equipo de Probotec está a traballar na creación dunha célula robotizada facilmente transportábel, versátil e modular, ao servizo das industrias e dos seus procesos de transformación, automatización, intelixencia e eficiencia. Ademais desta célula robotizada están a desenvolver da man doutra empresa tecnolóxica, Xoia, unha aplicación de Realidade Aumentada que lles permitirá ensinar aos seus clientes, mediante tecnoloxía de última xeración, como quedaría a dita célula en condicións reais antes da súa instalación sobre o terreo.
Para levar a cabo este plan, Probotec tamén conta co apoio da confederación de empresas do mar e conserveiras ANFACO-CECOPESCA, que desde o seu centro tecnolóxico impulsa máis de 70 proxectos de I+D+i anuais.
Volvendo ás axudas de InnovaPEME, sinalar que son axudas ás pequenas e medianas empresas destinadas ao financiamento do custo das actividades integradas en plans de innovación, que lles permitan sistematizar os procesos de innovación e estean aliñadas coas prioridades establecidas na RIS3 para Galicia. Son apoios cunha subvención a fondo perdido dunha intensidade do 50% para todos os custos de implementación do plan de innovación da empresa, incluídos custos de persoal propio. Desde a súa posta en marcha no ano 2017 InnovaPEME beneficiou a 160 empresas, 36 na última convocatoria, abranguendo 14 sectores e creando/mantendo máis de 760 empregos. Esta axuda caracterízase por subvencionar até o 50% do orzamento total.