A grandes empresas deberán facilitar un medio de interlocución telemática con sinatura electrónica

O Ministerio de Industria, Turismo e Comercio vén de anunciar que as grandes empresas que emprestan servizos ao público considerados de especial transcendencia económica (electricidade, auga e gas, telecomunicacións…) deberán, dende agora, facilitarlles aos seus usuarios un medio de interlocución telemática con sinatura electrónica para a realización de diversas xestións.
A medida comezará a aplicarse a partires da entrada en vigor desta obriga contida na Lei de Medidas de Impulso da Sociedade da Información, enmarcada no Plan Avanza, que prevé entre outras cousas, a adopción de iniciativas normativas dirixidas a eliminar as barreiras existentes ao espallamento e emprego das tecnoloxías da información e a reforzar os dereitos dos cidadáns na Sociedade da Información.
Entre os novos dereitos cidadáns consagrados na Lei, cómpre salientar que o pasado decembro entrou en vigor a obriga de que as empresas de meirande tamaño e que acheguen servizos ao público considerados como de especial transcendencia económica, faciliten aos seus clientes os seguintes trámites:

 Contratación electrónica de servizos, subministros de bens, a modificación e finalización ou rescisión dos contratos… así como calquera acto ou negocio xurídico entre as partes.

 Consulta dos datos de cliente, que incluirán información sobre o seu historial de facturación de, polo menos, os tres últimos anos e o contrato subscrito.

 Presentación de queixas, incidencias, suxestións e reclamacións, garantindo a constancia da súa presentación para o consumidor e asegurando unha atención persoal directa.

 Exercicio dos dereitos de acceso, rectificación, cancelación e oposición nos termos previstos na normativa reguladora de protección de datos de carácter persoal.
A fin de contas, o Goberno reforza os dereitos dos cidadáns na Sociedade da Información, establecendo unha nova canle de comunicación, alternativa ás tradicionais, que lle permitirá aos cidadáns acceder á información relevante e realizar calquera tipo de transacción.
A partires de agora, calquera cidadán poderá reclamar que a súa interlocución coas entidades obrigadas se leve a cabo empreñando un certificado electrónico recoñecido como poder ser o DNI electrónico. En calquera caso, esta obriga non exclúe outras formas de contratación electrónica sen sinatura ou de outra natureza.