A nova serie da TVG Urxencia Cero estrea web

A serie de televisión Urxencia Cero, impulsada por Voz Audiovisual, vén de estrear páxina de seu, en palabras da produtora “un novo punto de encontro na Rede que sumar aos xa habilitados por outras achegas míticas da TVG como Padre Casares, Matalobos ou Serramoura”. Urxencia Cero, que chegará este outono á grella da Televisión de Galicia, é un achegamento en clave de ficción ao día a día dunha unidade de transplantes, cuxos protagonistas serán os doantes, os pacientes e os profesionais que traballan consagrados a salvar as súas vidas.
Polo que atinxe a web, a intención é seguir o camiño de “éxitos” acadados polas incursións de Matalobos ou Serramoura nas redes sociais, “complementando a emoción da ficción televisiva cunha batería de accións en liña centradas en urxenciacero.com”, explican Voz Audiovisual e a TVG.
A páxina, engaden, nace con vocación de “ser un punto de encontro para os seareiros da que promete ser a serie deste outono en Galicia”. O sitio oficial de Urxencia Cero terá o seu reflexo 2.0 na páxina facebook.com/urxenciacero e da conta de Twitter @UrxenciaCero. A web incluirá imaxes inéditas, visitas á gravación, entrevistas cos seus protagonistas, avances e audiovisuais promocionais, etc.