A nova tarxeta sanitaria virtual do Sergas é interoperable en toda España

A Consellería de Sanidade vén de activar o novo modelo de tarxeta sanitaria virtual, que poderá empregarse tanto en centros sanitarios como en farmacias en todo o territorio nacional.
Esta iniciativa dá cumprimento ao Real Decreto 922/2024 e habilita o uso desta credencial en calquera punto do Estado, garantindo a súa interoperabilidade a nivel nacional.
A nova tarxeta, xa dispoñible para os usuarios do Servizo Galego de Saúde a través da aplicación Sergas Móbil, destaca pola incorporación dun código QR. Este elemento facilita a identificación do paciente en todo o sistema sanitario español, asegurando o seu recoñecemento en calquera servizo de saúde.
Ademais do aspecto técnico, o novo modelo incorpora unha imaxe gráfica renovada, máis coherente co deseño da tarxeta física actual, o que simplifica a súa identificación visual por parte de profesionais e usuarios.

Unha alternativa plenamente equivalente á tarxeta física

Desde agora, o usuario poderá levar a súa tarxeta sanitaria directamente no teléfono móbil. A Consellería de Sanidade subliña que esta versión dixital ten plena validez e equivale á tarxeta física.
Grazas a esta equivalencia, os cidadáns poderán realizar todas as xestións necesarias dentro do Servizo Galego de Saúde. Así mesmo, a tarxeta virtual permitirá acceder á prestación farmacéutica e retirar medicación nas farmacias de toda España de maneira áxil e segura.