A nova web do Obradoiro de Gaitas Seivane permite facer configuracións virtuais do instrumento

Tarde mais agardamos que nin mal nin arrastro facemos unha paréntese en Código Cero para dar conta da presentación (o 3 de novembro) da nova web do Obradoiro de Gaitas Seivane, páxina que é máis ben unha remodelación da xa existente no mesmo enderezo e (tamén) un novo xeito de afianzar a presenza da música galega neste grande universo cambiante que é o de Internet.
A nova faciana do espazo web do obradoiro Seivane foi presentada este venres 3 de novembro na Fundación Luís Seoane da Coruña perante un auditorio de máis de cen persoas, segundo se informa no blog Folque.com.
A páxina, que se abre ó mundo en catro linguas (galego, castelán, inglés e francés) foi deseñada pola Organización de Artesáns de España. O espazo Seivane.es, que é un manual ou tratado sobre a gaita galega en si mesmo (de feito, pódense baixar manuais en pdf sobre o seu uso), inclúe apartados de interese dende o punto de vista de aproveitamento das vantaxes de Internet, como por exemplo a sección onde se ofrecen ferramentas para configurar virtualmente o devandito instrumento en tódolos seus detalles, como por exemplo a cor, a madeira elixida ou as características da funda.