A primeira entrega de EA Sports FC presentarase o vindeiro xoves

O ano pasado EA Sports sorprendeu ao anunciar que prescindiría da marca FIFA nos seus xogos de fútbol, selo que viñan empregando dende finais de 1993, polo que este verán teñen que encarar o reto de lanzar unha nova marca, EA Sports FC, de xeito que no vindeiro curso, en vez de xogar ao FIFA 24 teremos nas tendas o FC 24, xogo que xa ten o seu tráiler de presentación, e que o vindeiro día 13 darase a coñecer en profundidade.
Pese a non estar baixo a marca FIFA, EA Sports FC contará coas competicións, ligas e futbolistas máis importantes do fútbol masculino e feminino, manterá a fórmula de éxito do Ultimate Team, e incluso realizará unha iniciativa social con varios proxectos relacionados co fútbol (cun orzamento de 10 millóns de dólares en 3 anos). En calquera caso, o investimento que terá que facer Electronic Arts será moito menor do que pretendía cobrar a FIFA pola súa marca, e dado que actualmente esta franquía de xogos non ten unha competencia real, o cambio de nome non debería pasarlle factura e probablemente quede como unha anécdota.