A rapazada iniciarase na pilotaxe de avións no campamento tecnolóxico de verán de Tecnópole

O Parque Tecnolóxico de Galicia – Tecnópole impulsa un ano máis a XIV edición do campamento tecnolóxico de verán T2W (Tecnópole Technological Workshops), que se vai desenvolver en colaboración coa Consellería de Economía e Industria. Esta iniciativa forma parte da aposta de Tecnópole pola divulgación científica de calidade entre os máis novos.
Diríxese a un total de 80 rapaces e rapazas de entre 12 e 18 anos, de 6º de Primaria a 2º de Bacharelato (40 en cada quenda). Haberá unha primeira quenda do 29 de xuño ao 3 de xullo e unha segunda do 6 ao 10 de xullo, en horario de 10:00 a 18:00 horas.
Dende a Tecnópole lembran que a inscrición deberá realizarse a través da propia web do T2W e que o prazo ficará aberto ata que se cubran a totalidade das prazas.
A Tecnópole tamén fai saber que “debido ao éxito obtido co módulo Voamos con números: unha aventura aérea levado a cabo durante o curso escolar na Aula Newton Galicia, instalada no Parque”, o Parque decidiu celebrar o seu campamento tecnolóxico de verán aproveitando a metodoloxía e os recursos empregados nesta Aula.
Tal como destacan desde Tecnópole, “o eido da aeronáutica e o espazo é un dos que máis interese espertan entre o alumnado”. Nesta liña, o campamento, cun enfoque práctico e experimental, oferta un conxunto de actividades didácticas e amenas que permitirán aos participantes introducirse nos conceptos básicos da aviónica e a electrónica necesarios para o desenvolvemento de proxectos aeroespaciais. Entre outras propostas, os asistentes aprenderán a pilotar utilizando simuladores de voo profesionais, crearán plans de voo, iniciaranse na montaxe e manexo de drons, na programación de placas electrónicas e mesmo realizarán prototipos mediante impresión 3D.
O custo do campamento é de 150 euros. Ademais de todas as actividades e os materiais tecnolóxicos e científicos, inclúese o transporte desde varios puntos da cidade de Ourense, a comida e o acceso diario ás piscinas do Parque.
A través desta experiencia procúrase que o alumnado “adquira novos coñecementos científicos e tecnolóxicos, preténdese potenciar neles actitudes como a curiosidade e o espírito emprendedor, entre outras”. Nesta liña, o Parque Tecnolóxico de Galicia leva anos traballando para favorecer as vocacións investigadoras e de emprendemento innovador entre a xuventude.