A segunda canle da TVG estrearase o vindeiro 25 de xullo

A Televisión de Galicia contará con novas canles de Televisión Dixital Terrestre, e a segunda das mesmas xa ten data de saída, o vindeiro 25 de xullo, coincidindo co 23º aniversario da TVG.
A nova canle galega levará por nome G2, será só dixital e terá uns custos de entre 1 e 2 millóns de euros, centrándose o inicio desta canle na difusión da imaxe de marca e na continuidade, posto que nun primeiro momento se nutrirá de contidos dos que xa ten os dereitos a TVG, pero atendendo ós sectores máis excluídos da programación, que será moi infantil , cultural ou xuvenil segundo o director do ente, Suso Iglesias. Tamén atenderá ó servizo público coa emisión en directo das sesións do Parlamento de Galicia e ofertará programación alternativa (cine en versión orixinal e deportes pouco habituais entre o grande público).
A TVG non ten que afrontar só o reto de crear novas canles nos vindeiros anos, senón que tamén está a traballar na dixitalización dos seus sistemas internos. Esta modernización tamén podería levar á ampliación do cadro de persoal da CRTVG ou o uso de servizos externos.
G2 se emitirá na canle de TDT que actualmente inclúe a programación internacional de A Galega, e para 2010 agardan contar tamén cunha canle con novas as 24 horas. Incluso a TVG podería contar con máis canles dixitais no futuro, que mesmo poderían ser de alta definición, aínda que na actualidade os esforzos se dedican a mellorar a cobertura da TDT en Galicia.