Abel Caballero entrega os diplomas do programa de formación en Competencias Dixitais

As instalacións do Auditorio Municipal do Concello de Vigo acolleron na mañá deste mércores 10 de decembro o acto de entrega dos diplomas correspondentes á realización do programa de formación en Competencias Dixitais. O rexedor vigués, Abel Caballero, felicitou aos 60 participantes polo seu traballo de formación.
Os cursos foron impartidos no Centro de Formación e Emprego da Rúa Alta, e teñen como obxectivo mellorar “as competencias persoais e dixitais de maiores de 65 anos e persoas que poden ter risco de exclusión”, como explicou Caballero, afirmando que “estamos facendo capacitación dixital e eliminando a fenda dixital que hai en tantos lugares e que en Vigo trataremos de que sexa rapidamente pechada”. Cada unha das actividades formativas conta con 12 alumnos e a capacitación esténdese a un total de 70 horas.