Ábrese a convocatoria para incorporar 75 centros ao proxecto de libro dixital E-Dixgal
xoves, 20 de febreiro do 2020
A Consellería de Educación, Universidade e Formación
Profesional publica
hoxe no Diario Oficial de Galicia e no Portal Educativo a convocatoria para
a selección de centros para participar no proxecto Educación Dixital (E-Dixgal)
durante o curso 2020/21. Tal e como indica a convocatoria, está
prevista a incorporación de 75 centros a esta iniciativa, a través da que
se facilitan ao alumnado, de xeito gratuíto, libros e outros materiais dixitais
cos que poidan desenvolver o seu proxecto curricular de 5º e 6º de educación
primaria e 1º e 2º da ESO.
Os centros que se incorporen a este proxecto serán dotados
cos medios tecnolóxicos necesarios na aula para profesorado e alumnado.
Ademais, terán acceso a unha contorna virtual de aprendizaxe cos contidos
gratuítos proporcionados pola Xunta e deberán utilizar para o desenvolvemento
curricular materiais de referencia dixitais, que poden proceder desta contorna
ou ser proporcionados polo centro.
A incorporación ao E-Dixgal en educación primaria implica
impartir todas as materias en modalidade dixital; mentres que facelo en ESO
supón impartir un mínimo de seis materias, a elección do centro, en modalidade
dixital. Se o centro conta con libros e outros materiais didácticos dixitais,
poden empregarse como complemento ou apoio.
A convocatoria E-Dixgal diríxese aos centros educativos
galegos sostidos con fondos públicos que impartan o próximo curso ensinanzas de
5º e 6º de primaria e de 1º e 2º da ESO. Os aspirantes deberán contar con aulas
dixitalizadas (cos elementos do kit de aula dixital – EDI, proxector e equipo
no posto do/a docente e conexión á rede de datos do centro) en todas as aulas
implicadas no programa, así como cunha conexión de datos cunha velocidade
nominal mínima de baixada de 100 Mbps.
O prazo para a presentación de candidaturas está aberto ata o
23 de marzo de 2020, incluído. As solicitudes deben dirixirse á Dirección Xeral
de Educación, Formación Profesional e Innovación Educativa e presentarse
obrigatoriamente por medios electrónicos na
Sede Electrónica da Xunta de Galicia.
O proxecto E-Dixgal enmárcase na Estratexia galega para a
educación dixital (Edudixital 2020). Nese curso participan neste proxecto un
total de 345 centros, que verán súa permanencia prorrogada no programa a través
desta convocatoria.