Akamai debulla o estado global da velocidade das nosas conexións á Rede

Os datos do informe de Akamai poden consultarse a través dun mapa interactivo

Akamai Technologies, compañía que facilita a empresas de todo o mundo que poidan achegar os seus contidos dun xeito áxil a través da Internet a usuarios de todo o mundo, publicou o seu informe sobre o estado da Internet durante o último trimestre de 2012 baseado en datos recollidos pola súa plataforma de servidores na nube que rexistra información como a velocidade das conexións, os ataques e a conectividade de rede.
O informe recolle preto de 700 millóns de enderezos IP de 240 países conectados á plataforma de Akamai, o que serve para comprobar que a velocidade media de acceso á Internet rexistrada mellorou un 5% trimestral ata chegar aos 2,9 Mbps, mentres que de facermos un balance interanual falariamos dun crecemento do 25%. De falarmos de velocidades punta teriamos que a media global sería de 16,6 Mbps. Sobre a adopción da banda ancha, vemos que os datos globais están a mellorar substancialmente, e o 42% dos usuarios gozarían de conexións de máis de 4 Mbps, mentres que un 11% terían accesos á Rede de máis de 10 Mbps.
Estas informacións estarían referidas ás conexións fixas, pois o contorno móbil é bastante diferente, con conexións moi dispares entre distintos operadores e usuarios, e cun volume de transferencia cada vez maior, e neste elemento é no que podemos fixarnos para saber un pouco máis sobre os dispositivos que emprega a xente para moverse pola web dende o móbil, rexistrándose que o navegador web móbil de Android é xa o maioritario co 35,5% dos dispositivos móbiles, superando o 32,5% de iOS, aínda que se en vez de contar os dispositivos medimos o seu volume de accesos a situación cambiaría radicalmente cunhas porcentaxes do 21,7% e o 58,7% respectivamente.
Se atendemos ao caso español, temos que España rexistra unha velocidade media de 4.931 Kbps (na liña dos países veciños) e con velocidades punta medias de 27.788 Kbps, indicadores que fan quedar bastante ben ao país, aínda que se miramos valores como a porcentaxe de conexións de máis de 10 Mbps (5%) ou de máis de 4 Mbps (47,74%) quedariamos bastante por detrás doutros países europeos. Outro dato que pode resultar rechamante é que Akamai aínda rexistra un 0,5% de conexións a menos de 256 Kbps, cando en Portugal (0,07%) e Francia (0,12%) son moito menos frecuentes, o que podería ser reflexo dunha fenda dixital especialmente pronunciada no rural español.