Amazon estrea escaparate virtual

A perspectiva tridimensional permite movernos dun xeito moi agradable entre os produtos destacados da semana en distintas categorías

A tenda virtual máis grande do mundo estreou un novo escaparate, Amazon Windowshop, que nos presenta cunha perspectiva tridimensional unha escolma dos seus produtos máis destacados divididos en categorías coma películas, libros, música ou videoxogos, amosando unha imaxe identificativa dos produtos, dos que podemos ter unha vista previa ao seleccionalos.
Esta interface é moi visual, e busca que os produtos destacados de Amazon (actualizados semanalmente) nos entren polos ollos, incluíndo atallos para poder realizar a nosa compra dos mesmos. Podemos movernos neste escaparate coas teclas dos cursores do teclado do ordenador, e cando seleccionamos un elemento podemos ver un vídeo promocional (no caso de videoxogos ou películas), escoitar un fragmento (nos discos ou audiolibros) ou simplemente ler a súa descrición co acompañamento de voz sintetizada (nos libros).
Estamos ante un interesante experimento que podería ter boa aceptación entre certo público ocasional, aínda que a interface tradicional de Amazon xa demostrou sobradamente estar moi optimizada, e se considera un exemplo a imitar.
De Amazon Windowshop tampouco podemos evitar comentar que a presentación dos produtos é moi semellante ao efecto que se pode conseguir no Internet Explorer ou no Firefox ao instalar un engadido chamado CoolIris, que presenta tridimensionalmente os nosos resultados de busca de imaxes e vídeos, permitíndonos movernos entre os mesmos.

As películas destacadas por Amazon Windowshop veñen acompañadas polo seu trailer