AnyTV, outra aplicación para ver a televisión a través da Internet

Existen moitas solucións para ver a televisión dende un ordenador conectado á Internet, sendo unha das máis empregadas Zattoo, pero para os usuarios que queiran acceder a canles internacionais hai que empregar outras plataformas coma AnyTV, que permite ver máis de 2.630 canles de televisión, 4.750 canles de radio e preto de 7.000 vídeos segundo os responsables desta aplicación informática (que está moi lonxe de achegar o prometido, pero que de tódolos xeitos é unha boa opción para poder acceder a contidos televisivos).
Como vén a ser habitual neste tipo de programas, AnyTV presenta un recadro coa emisión televisiva a reproducir e outro coa listaxe de canles que podemos explorar ordenados por país de emisión. Para depurar esta relación de contidos os usuarios poden puntuar as canles.
Esta ferramenta funciona dun xeito moi diferente a Zattoo, de xeito que cada canle ten as súas propias peculiaridades (calidade de imaxe, posibilidade de ver a pantalla completa...) e, aínda que resulte frustrante non pode acceder a moitas das canles listadas na aplicación (mesmo nas españolas) incrementa substancialmente a oferta audiovisual no noso ordenador.