Apple anuncia a compra de Beats por 3.000 millóns de dólares
xoves, 29 de maio do 2014
Tras varias semanas de rumores, Apple
confirma a compra do servizo musical de subscrición Beats Music e de Beats
Electronics, compañía detrás dos populares auriculares Beats, incluíndo
nesta adquisición aos co fundadores da compañía, Jimmy Iovine e Dr. Dre, que
pasan a traballar para Apple. A operación pechouse nun total de 3.000 millóns
de dólares, dos que 2.600 millóns satisfaranse agora e o resto ao longo do
tempo, de xeito que o prezo final sería uns 200 millóns de dólares inferior ao
rumoreado.
O director xeral de Apple, Tim Cook, asegura que a música sempre foi moi
importante para a súa compañía, de aí que “xuntando a estes extraordinarios
equipos podemos continuar a crear os produtos e servizos musicais máis
innovadores do mundo”. Jimmy Iovine, pola súa banda, recoñece que a súa
compañía botou a andar inspirándose en Apple, pola súa habilidade para mesturar
cultura e tecnoloxía, de aí que estea moi satisfeito coa operación.
Nos 5 anos de vida de Beats a compañía conseguiu converter o b do seu logotipo en toda unha icona
recoñecida mundialmente, en boa medida pola complicidade de moitas celebridades
como Lady Gaga, LeBron James, Serena Williams e Neymar, facendo que vestir uns auriculares Beats fose un
signo de status e servise para ir á moda, o que contribuíu á súa adopción
masiva. A súa estética tamén xogou un papel fundamental para que os produtos de
Beats estivesen dispoñibles en moitas das tendas oficiais de Apple en todo o
mundo, así como en moitos dos seus revendedores autorizados.
Queda agora por ver que é o que fará Apple coas compañías que vén de adquirir,
pero previsiblemente realizará algún anuncio ao respecto a semana que vén, no
marco do encontro WWDC, no que veremos moitas das novidades da compañía da mazá
para os vindeiros meses.