As Universidades e Industria xuntan esforzos e criterios en materia de innovación
xoves, 5 de setembro do 2013
Cómpre impulsar a
innovación galega dende tódalas frontes e isto dificilmente se vai
acadar de non contarmos con máis e mellores alianzas entre
institucións, universidades e empresas. Ao fío deste argumento, os
pasados días celebrouse unha xuntanza entre os reitores das nosas
tres universidades (Xosé Luís Armesto pola UDC, Juan Casares pola
USC e Salustiano Mato pola UVigo) e o conselleiro de Economía e
Industria, Francisco Conde, que
tiveron a oportunidade de compartir experiencias e puntos de vista
arredor da Estratexia de Especialización Intelixente (RIS3) que
marcará as pautas en innovación galega ata 2020. Trátase dun
documento impulsado e desenvolvido polas ditas institucións
educativas e outros 200 axentes do sistema galego de innovación e
que se vai presentar as vindeiras semanas perante a Comisión
Europea.
Segundo explicaron os
participantes na xuntanza, permitirá que a nosa comunidade reciba
2.000 millóns de fondos FEDER e FSE entre 2014 e 2020, dos que 1.200
millóns dedicaranse a innovación, eficiencias enerxética e apoio á
competitividade das PEME. O documento precisou de varios meses de
intenso traballo co fin de dar forma ás preto de 40
propostas-obxetivos que acubilla. Segundo informa a Consellería de
Economía, algúns destes obxectivos pasan “por converter a Galicia
nun provedor da industria aeronáutica; desenvolver as tecnoloxías,
servizos e loxística da biomasa; aproveitar os residuos e
subprodutos do sector agroforestal e a súa industria transformadora;
desenvolver novos materiais e aplicar as tecnoloxías emerxentes;
potenciar a comercialización do turismo cultural; aplicar as novas
tecnoloxías da información para favorecer o envellecemento activo,
e a innovación en nutrición”.