As discográficas quere resucitar os CD cos ringles

Referencia paródica ós ringles extraída do blog The Boy Genius Report

A industria discográfica está desesperada na busca de novas formas de explotar os soportes físicos de comercialización musical, e o intento que vai facer de cara á campaña de Nadal vai ser o lanzamento do ringle, que sería un disco sinxelo (single) que incluiría 3 cancións xunto a un fragmento musical que podería utilizarse coma ton de chamada no móbil (ringtone).
Esta idea vén de Sony BMG, pero parece que vai ser a Universal a primeira discográfica en colocar ringles no mercado, pois parece que xa teñen entre 10 e 20 títulos preparados para un inminente lanzamento.
A RIAA (patronal desta industria en EE.UU.) aprobou o termo ringle, e grandes vendedores coma Wal-Mart, Target, Best Buy e Amazon apoiarán o novo formato, pero parece difícil que a xente volva a mercar este tipo de produtos cando a meirande parte dos reprodutores musicais están baseados en memorias Flash ou discos duros.