As nosas empresas locen empuxe innovador perante sete firmas internacionais

O Clúster TIC Galicia celebra dende hoxe unhas xornadas técnicas para facer avanzar no mundo o sector galego das empresas de novas tecnoloxías. Na inauguración participou, entre outros representantes do tecido innovador galego (público e privado) o director do Instituto Galego de Promoción Económica (IGAPE), Juan Cividanes, quen salientou que o potencial deste sector é fundamental para avanzar na internacionalización do tecido produtivo galego. As xornadas técnicas, que se desenvolven até o venres baixo o formato de misión comercial inversa, consisten nun completo programa de sesións de networking e presentacións cos responsábeis de sete empresas tecnolóxicas Eslovenia, México, Colombia, Chile, Honduras e Nicaragua.
Durante a súa intervención, Cividanes resaltou a boa evolución da presenza exterior das empresas galegas TIC, sinalando que o impulso do sector “é clave para adaptar o resto dos ámbitos produtivos estratéxicos galegos á implantación da fábrica intelixente e ás tecnoloxías emerxentes, que a Xunta promove ao abeiro da Axenda Industria 4.0”. Segundo engadiu, “o papel das empresas tecnolóxico-dixitais é fundamental tamén no reforzo á proxección exterior das PEME galegas no seu conxunto, obxectivo que impulsa a Estratexia de Internacionalización da Empresa Galega posta en marcha pola Consellería de Economía, Emprego e Industria”.
Cividanes subliñou que no pasado ano 2018 exportaron aos seis países participantes na misión comercial 1679 empresas galegas por importe de 568,2 millóns de euros. E engadiu: “O incremento no primeiro trimestre do ano das vendas a América Latina das empresas galegas en xeral foi do 3% e do 5,6% a Eslovenia”.
Entre as empresas que forman parte do Clúster TIC galego que exportan aos países participantes na misión figuran Redegal, EGATEL, Cinfo e Tesla.
Durante a xornada de hoxe as empresas participantes que integran a delegación comercial realizaron exposicións técnicas, ás que seguiron as presentacións das PEME que integran o clúster e dos centros tecnolóxicos galegos que traballan no eido da I+D+i.