As series de Hitman e Tekken protagonizan os Xogos con Gold de setembro

xoves, 29 de agosto do 2019 Marcus Fernández

A selección de Xogos con Gold que recibirán os subscritores de pagamento de Xbox LIVE no mes de setembro é bastante interesante, xa que ten como xogo estrela á primeira tempada completa de Hitman, ou sexa, a versión do xogo de acción de IO Interactive que inclúe todas as localizacións da primeira tempada e os episodios Prólogo, París, Sapienza, Marrakech, Bangkok, Colorado e Hokkaido, así como todos os episodios, desafíos, oportunidades, contratos de intensificación, contratos destacados e acceso a futuras actualizacións con novos obxectivos escorregadizos. Unha vez máis encarnaremos ao Axente 47 acabando con obxectivos nunha historia de espías na que os asasinatos son a tónica de cada día.
O outro xogo para Xbox One que chegaría en setembro sería We Were Here, un título independente no que haberá que unir forzas en liña con outra persoa para colaborar na fuxida dun castelo abandonado coa única axuda dun walkie-talkie. A cooperación será a chave para superar os distintos desafíos que xorden neste título.
Os títulos de Xbox 360 retrocompatibles con Xbox One xa son vellos coñecidos, como o Earth Defense Force 2025, un shooter futurista de Sandlot Studios que non resulta tan atractivo como Tekken Tag Tournament 2, xogo de loita que completará o mes, e que conta cun amplo cadro de loitadores con cadanseus movementos. Aínda que Tekken Tag Tournament 2 ten xa bastantes anos, continúa a ser todo un referente, xa que contribuíu á evolución dos xogos tag, nos que os loitadores poden combater 1 contra 1, pero sendo posible alternar o xogador de cada equipo e incluso lanzar ataques conxuntos entre ambos personaxes.

PUBLICIDADE