Até 3,3 millóns de espectadores seguiron unha velada de boxeo por Twitch

luns, 27 de xuño do 2022 Marcus Fernández

O célebre streamer Ibai Llanos organizou esta fin de semana en Badalona unha velada de boxeo con varios combates protagonizados por celebridades de Internet, que remataba co combate estelar entre o cantante David Bustamante e o youtubeiro Míster Jägger, que demostrou a forza da comunidade castelanfalante na Internet ao establecer unha nova marca de espectadores simultáneos en Twitch.
3,3 millóns de espectadores rexistráronse durante o minuto de ouro da velada, que de media tivo 2,4 millóns de espectadores. Os anteriores records de espectadores simultáneos en Twitch conseguíranos TheGrefg con 2,5 millóns e Xocas con 1,2 millóns, dando a impresión de que os directos na Rede teñen cada vez máis pulo e avanzan para poder compararse ás retransmisións en plataformas tradicionais.
Cómpre salientar que, pese a ser un evento en directo, en Twitch acumula máis de 46,7 millóns de reproducións e os distintos vídeos da canle de Ibai sobre a velada tamén suman máis de 25 millóns de reproducións, deixando constancia que a creación de retransmisións na Rede tamén teñen relevancia nas horas seguintes, o que xunto ao impacto en redes sociais supón unha proxección difícil de imaxinar hai poucos anos.

JPEG - 115.3 KB
A audiencia da velada rexistrou marcas de impresión

PUBLICIDADE