Até trinta empresas de Vilamarín e Pontedeva contan xa coa rede ultrarrápida de R

Comeza o novo ano e seguen adiante os traballos do Plan de Banda Larga da Xunta, do que a firma R é adxudicataria, destinados a implantar redes ultrarrápidas nos polígonos da nosa terra que non dispoñen delas. Entre as contornas industriais onde se veñen de estrear (coa chegada de 2019) os novos equipamentos de FTTH (Fiber To The Home) figuran o parque empresarial de Vilamarín e a zona de promoción industrial de Trado, en Pontedeva (provincia de Ourense). Estes despregues implican que arredor dunhas trinta empresas destas contornas industriais dispoñan xa de acceso a Internet con velocidades de até 350 Mpbs.
Segundo informa R, estas mesmas tecnoloxías chegaron tamén (previamente) ás seguintes superficies empresariais ourensás: os polígonos empresariais de Allariz (Chorente e Roiriz), O Barco de Valdeorras, Carballeda de Valdeorras (A Médua), Celanova, Ribadavia, Verín, Xinzo da Limia e Vilar de Santos. Todos eles están xa conectados a redes ultrarrápidas de internet, de xeito que son 11 os polígonos ourensáns beneficiados polo Plan dende que comezaron as actuacións en 2016.
A operadora R tamén lembra que os polígonos acabados de de beneficiar poden contratar servizos de Internet a través de fibra óptica cunhas velocidades de até 350 Mbps de baixada e 35 de suba, e cunha garantía de caudal do 80% sen límite de descargas.
R recorda igualmente que, grazas aos ditos equipamentos, pon a disposición das empresas dos polígonos “a tecnoloxía precisa para acometer a súa transformación dixital”. Ou sexa, servizos e solucións na nube como por exemplo a videoconferencia, o acceso á Internet das Cousas (IoT) ou os procedementos do que se coñece como Industria 4.0, vencellados a conceptos e metodoloxías como a eficiencia enerxética, o control de intrusións nas edificacións, os servidores virtuais e a analítica de datos (Big Data), entre outros eidos. “Todas estas cousas e outras moitas máis”, explicou a compañía de raizame galega, “son posíbeis grazas ás vantaxes das redes FTTH (Fiber To The Home) que levan a fibra óptica ata a propia empresa nestes polígonos xa conectados ás redes ultrarrápidas de R”.
Prazos e orzamento
O Plan xa completou o despregue nos 81 polígonos da Comunidade que estaban previstos. Deste xeito, a peche de 2018, un total de 130 polígonos, que concentran case o 93% da superficie empresarial ocupada, dispoñen xa de acceso a redes de máis de 100 Mpbs. Este fornecemento de tecnoloxías supón un investimento total de 5,2 millóns de euros, dos que 3,4 son subvencionados pola AMTEGA e co-financiados ao 75% polo Fondo Europeo Agrícola de Desenvolvemento Rural (FEADER) no marco do Plan de Desenvolvemento Rural de Galicia 2014-2020 (PDR).