AtlantTIC loce no Mobile World Congress os seus avances en 5G
martes, 27 de febreiro do 2018
Estes días fálase moito do
senlleiro encontro internacional Mobile
World Congress que se está a celebrar en Barcelona e dáse a
circunstancia de que moito do que se fala pouco ou nada ten que ver
coas tecnoloxías móbiles e coas aplicacións desenvolvidas para
facernos a vida máis cómoda e, dende logo, máis conectada. Para
romper un pouco esta tónica e meternos no que de verdade importa en
relación ao MWC, a tecnoloxía, lembramos que no salón están a
mostrar recursos innovadores sete empresas galegas ao abeiro do
Pavillón de España (Tecalis
Innovación, Disashop,
Igalia, Improving
Metrics, Quobis Networks,
Xesol Innovation e
Visual Publinet) e que,
ademais, a Universidade de Vigo tamén loce interesantes
descubrimentos na xuntanza. Máis
polo miúdo os investigadores do Grupo GTI do centro AtlantTIC,
encabezados por Felipe Gil.
En concreto, están a amosar no
MWC o resultado do seu traballo no proxecto Veo5G: Virtualización
eficiente de operadores 5G. Xunto a Gil, Carlos Pérez, Pablo
Fondo e Abel Fernández, integran a representación de AtlantTIC no
congreso internacional. Segundo lembran, o Grupo GTI leva anos
traballando nas redes de comunicación sen fíos e móbiles e,
recentemente, centrouse nas tecnoloxías que darán alicerce ás
futuras redes de quinta xeración. Con este obxectivo, os
investigadores do dito centro vigués están a traballar coas firmas
Cellnex e Optare e o centro tecnolóxico Gradiant no marco do
proxecto Veo5G, centrado en avanzar nas tecnoloxías que
están a redefinir as redes 5G, máis polo miúdo as tecnoloxías que
permiten construír redes flexíbeis e dinámicas.
Segundo explican, “a nosa
participación no congreso ten dous obxectivos, establecer un
primeiro contacto coas empresas interesadas na tecnoloxía, cara a
súa transferencia, e o de aumentar a rede de contactos no plano
investigador para seguir avanzando no desenvolvemento a través dun
sistema cooperativo”. Os investigadores de AtlantTIC engaden, para
quen non o saiba a estas alturas, “que o 5G é a evolución da
tecnoloxía actual 4G, empregada nos móbiles para a transmisión de
datos, aínda que a súa implantación pretende ir máis aló da
telefonía, achegando solucións de conectividade e novos servizos,
como poden ser os relacionados co Internet das Cousas, a Industria
4.0 ou o vehículo conectado, permitindo ademais conexións moito
máis rápidas”.
Ao longo da semana que dura o
Mobile World Congress realizarán demostracións da súa tecnoloxía
no stand de Cellnex, nas que mostrarán cousas como a
posibilidade real de compartir infraestruturas para varios operadores
especializados, ou a adaptación das redes aos requirimentos de
usuarios de xeito individual.